ഡിഎൻഎ പരിശോധന: 401 ശരീരഭാഗങ്ങളിൽ ജീർണിച്ചവയിൽ കൂടുതൽ പരിശോധന

ബത്തേരി : വയനാട്ടിലെ ഉരുൾപൊട്ടൽ ബാധിത പ്രദേശങ്ങളിൽ നിന്ന് കണ്ടെടുത്ത 401 മൃതദേഹങ്ങളുടെയും ശരീരഭാഗങ്ങളുടെയും ഡിഎൻഎ പരിശോധന പൂർത്തിയാക്കിയതായി ആരോഗ്യവകുപ്പ് അധികൃതർ.  ഇതിൽ 349 ശരീരഭാഗങ്ങൾ 248 ആളുകളുടേതാണ്. ഇതു 121  പുരുഷൻമാരും  127 സ്ത്രീകളുമാണെന്നു തിരിച്ചറിഞ്ഞു. 52 ശരീര ഭാഗങ്ങൾ പൂർണ്ണമായും അഴുകിയ നിലയിലാണ്. ഇത് വരെ നടന്ന  തെരച്ചലിൽ 437 മൃതദേഹങ്ങളും ശരീരഭാഗങ്ങളുമാണ് ലഭിച്ചത്. 

ആർമി, സ്‌പെഷ്യൽ ഓപ്പറേഷൻസ് ഗ്രൂപ്പ്, ഫയർ ആൻഡ് റെസ്‌ക്യൂ സർവീസസ്, ഫോറസ്റ്റ് ഡിപ്പാർട്ട്‌മെൻ്റ്, നൂറുകണക്കിന് സന്നദ്ധപ്രവർത്തകർ എന്നിവരെ ഉൾപ്പെടുത്തി നടത്തിയ സമഗ്രമായ തിരച്ചിലിലാണ് ശരീരങ്ങൾ കണ്ടെടുത്തത്.സംസ്ഥാന റവന്യൂ മന്ത്രി കെ രാജൻ പറയുന്നതനുസരിച്ച്, ഇവയിൽ 52 ശരീരഭാഗങ്ങൾ തിരിച്ചറിയാൻ കഴിയാത്തവിധം ജീർണിച്ചതിനാൽ കൂടുതൽ പരിശോധന ആവശ്യമുണ്ട്, കാരണം നിരവധി ആളുകൾ ഇപ്പോഴും അവരുടെ കുടുംബങ്ങളെക്കുറിച്ചുള്ള വിവരങ്ങൾക്കായി കാത്തിരിക്കുകയാണ്. 115 പേരുടെ  രക്തസാമ്പിളുകൾ ഇതുവരെ ശേഖരിച്ചു. ബീഹാർ സ്വദേശികളായ മൂന്നുപേരുടെ രക്തസാമ്പിളുകൾ ഇനി ലഭ്യമാവാനുണ്ട്. 

അതേസമയം, നിലമ്പൂർ മേഖലയിലും ചാലിയാർ നദിയിലും ചൊവ്വാഴ്ചയും തിരച്ചിൽ തുടർന്നു, മൂന്ന് ശരീരഭാഗങ്ങൾ കൂടി കണ്ടെത്തി. നിലവിൽ 231 മൃതദേഹങ്ങളും 206 ശരീരഭാഗങ്ങളും കണ്ടെടുത്തിട്ടുണ്ടെന്നും 12 ക്യാമ്പുകളിലായി 1505 പേർ ഇപ്പോൾ കഴിയുന്നുണ്ടെന്നും 415 സാമ്പിളുകൾ ഡിഎൻഎ പരിശോധനയ്ക്ക് അയച്ചിട്ടുണ്ടെന്നും വനം മന്ത്രി എ കെ ശശീന്ദ്രൻ പറഞ്ഞു.