‘സ്റ്റേജിൽ ആദ്യമായി പാടിയത് ജയേട്ടനൊപ്പം; വിയോ​ഗം സങ്കടപ്പെടുത്തി’ : ചിത്ര

തൃശൂർ : ഭാവ ​ഗായകൻ ജയചന്ദ്രന്റെ വിയോ​ഗ വാർത്ത കേട്ടപ്പോൾ വളരയേറെ ദുഃഖം തോന്നിയതായി ​ഗായിക കെഎസ് ചിത്ര. ഫെയ്സ്ബുക്ക് കുറിപ്പിലൂടെയാണ് അവർ ആദരാഞ്ജലി നേർന്നത്.

കെഎസ് ചിത്രയുടെ ഫെയ്സ്ബുക്ക് കുറിപ്പ് :-

‘ജയേട്ടന്റെ പെട്ടെന്നുള്ള വിയോഗ വാർത്ത കേട്ടപ്പോൾ എനിക്ക് വളരെ ദുഃഖം തോന്നി. അദ്ദേ​ഹത്തിനൊപ്പമാണ് ഞാൻ സ്റ്റേജ് ഷോയിൽ ആദ്യമായി പാടി തുടങ്ങിയത്. അദ്ദേഹം എന്റെ വീട്ടിൽ വരാറുണ്ട്. അദ്ദേഹത്തിനൊപ്പം ധാരാളം സമയം ചെലവിടാൻ സാധിച്ചതു ഭാ​ഗ്യമായി കരുതുന്നു.’

‘തൃശൂരിൽ വന്നപ്പോൾ വയ്യാതിരിക്കുന്ന അദ്ദേഹത്തെ 3 തവണ കാണാൻ ശ്രമിച്ചു. എന്നാൽ സന്ദർശകരെ അനുവദിക്കാത്തതിനാൽ അതിനു അവസരം ലഭിച്ചില്ല. അതിൽ സങ്കടമുണ്ട്.’

​’ഗുരുവായൂരപ്പ ഭക്തൻ എന്ന നിലയിൽ വൈകുണ്ഠ ഏകാദശിക്ക് തൊട്ടുമുൻപ് അദ്ദേഹം നമ്മെ വിട്ടുപിരിഞ്ഞു. അനുഗ്ര​ഹീതമായ ആത്മാവ്. അദ്ദേഹത്തിനു ആത്മശാന്തി നേരുന്നു. കുടുംബാം​ഗങ്ങളോടു ഹൃദയം​ഗമമായ അനുശോചനം അറിയിക്കുന്നു. സദ്​ഗതി.’