എഗ്‌മൂർ എക്സ്പ്രസിന്റെ അടിഭാഗത്ത് വിള്ളൽ : പുതിയ ബോഗി ഘടിപ്പിച്ച് യാത്ര തുടർന്നു
കൊല്ലം : എഗ്‌മൂർ എക്സ്പ്രസ് ട്രെയിനിന്റെ സ്ലീപ്പർ കോച്ചിന്റെ അടിഭാഗത്ത് ഓട്ടത്തിനിടെ വിള്ളൽ രൂപപ്പെട്ടു. കൊല്ലത്തു നിന്ന് ഇന്നലെ ഉച്ചയ്ക്ക് 12.15ന് യാത്ര തിരിച്ച ട്രെയിൻ ചെങ്കോട്ട റെയിൽവേ സ്റ്റേഷനിൽ എത്തിയപ്പോഴാണ് വിള്ളൽ ശ്രദ്ധയിൽപെട്ടത്. 14 ബോഗികളുണ്ടായിരുന്ന ട്രെയിനിന്റെ എസ് 3 കോച്ചിന്റെ അടിഭാഗത്ത് ഷാസിയിൽ ആണ് വലിയ വിള്ളലുണ്ടായിരുന്നത്. വിള്ളൽ കണ്ടെത്തി ബോഗി മാറ്റി ട്രെയിൻ യാത്ര തുടർന്നു.
ഒരുമണിക്കൂർ കൊണ്ട് ഷണ്ടിങ് നടത്തിയാണ് വിള്ളലുണ്ടായ ബോഗി മാറ്റിയത്. തുടർന്ന് ഈ റിസർവേഷൻ കോച്ചിലെ യാത്രക്കാരെ എസ് 2 കോച്ചിലേക്കു മാറ്റി. 13 ബോഗികളുമായി യാത്രതിരിച്ച ട്രെയിൻ മധുരയിലെത്തി പുതിയ ബോഗി ഘടിപ്പിച്ച് യാത്ര തുടരുകയായിരുന്നു.
