സിപിഎം പിന്മാറി, സിപിഐക്കും കേരളാ കോൺഗ്രസ് എമ്മിനും രാജ്യസഭാ സീറ്റ്

തിരുവനന്തപുരം: സംസ്ഥാനത്തെ മൂന്ന് രാജ്യസഭാംഗങ്ങളുടെ തെരഞ്ഞെടുപ്പിൽ വിട്ടുവീഴ്ച ചെയ്ത് സിപിഎം. സിപിഎമ്മിൻ്റെ രാജ്യസഭാ സീറ്റ് കേരള കോൺഗ്രസ് എമ്മിന് വിട്ടുനൽകിക്കൊണ്ടാണ് വിട്ടുവീഴ്ച ചെയ്തത്. ഒഴിവുള്ള മൂന്ന് സീറ്റിൽ മുന്നണിക്ക് ഉറപ്പുള്ളത് രണ്ട് സീറ്റാണ്. അതിൽ ഒന്നിലാണ് കേരള കോൺഗ്രസ് എം മത്സരിക്കുക. അവശേഷിക്കുന്ന സീറ്റിൽ സിപിഐ സ്ഥാനാര്‍ത്ഥി മത്സരിക്കും. ജോസ് കെ മാണിയാണ് കേരള കോൺഗ്രസ് എമ്മിൽ നിന്ന് രാജ്യസഭയിലേക്ക് മത്സരിക്കുക. രാജ്യസഭാ സീറ്റിൽ അവകാശ വാദം ഉന്നയിച്ച ആര്‍ജെ‍ഡി കടുത്ത വിമ‍ര്‍ശനമാണ് ഉന്നയിച്ചത്.എളമരം കരീം ( സിപിഎം) ബിനോയ് വിശ്വം ( സിപിഐ), ജോസ് കെ മാണി ( കേരളാ കോൺഗ്രസ് എം) എന്നിവരുടെ സീറ്റുകളാണ് ഒഴിവുവരുന്നത്. ഇതിൽ രണ്ടെണ്ണം മാത്രമാണ് നിലവിൽ എൽഡിഎഫിന് ജയിക്കാനാകുക.