കോഴിക്കോട്: മനുഷ്യാവകാശപ്രവര്ത്തകന് ഗ്രോവാസുവിനെ വെറുതെവിട്ട് കുന്ദമംഗലം ഫസ്റ്റ് ക്ലാസ് മജിസ്ട്രേറ്റ് കോടതി. നിലമ്പൂരില് മാവോയിസ്റ്റ് പ്രവര്ത്തകര് പൊലീസ് വെടിയേറ്റ് കൊല്ലപ്പെട്ട സംഭവത്തില് കോഴിക്കോട് മെഡിക്കല് കോളജ് പരിസരത്ത് പ്രതിഷേധിച്ച കേസിലാണ് വിധി.
കരുളായി വനമേഖലയില് മാവോയിസ്റ്റുകളുടെ ഏറ്റുമുട്ടല് കൊലപാതകവുമായി ബന്ധപ്പെട്ട് മെഡിക്കല് കോളജ് മോര്ച്ചറിക്ക് മുന്നില് സംഘം ചേര്ന്നുവെന്നും വഴി തടസപെടുത്തിയെന്നുമായിരുന്നു കേസ്. കൂട്ടുപ്രതികളെല്ലാം 200 രൂപ പിഴയടച്ച് കോടതി നടപടികള് അവസാനിപ്പിച്ചപ്പോള് ഗ്രോവാസു അതിന് തയാറായില്ല. കോടതിയില് കേസ് പരിഗണിച്ചപ്പോഴൊന്നും ഹാജരായതുമില്ല. തുടര്ന്ന് ജൂലൈ 29ന് 94 വയസുകാരനായ ഗ്രോവാസുവിനെ പൊലീസ് അറസ്റ്റ് ചെയ്ത് ജയിലിലാക്കിയിരുന്നു.
45 ദിവസത്തോളം ജയിലില് കഴിഞ്ഞ അദ്ദേഹം തെറ്റ് ചെയ്തില്ലെന്ന വാദത്തില് ഉറച്ചുനിന്നു. തനിക്കെതിരായ കേസ് കെട്ടിച്ചമച്ചതാണെന്ന് വാസു വാദിച്ചു. കഴിഞ്ഞ ദിവസം കോടതിയില് മുദ്രാവാക്യം വിളിച്ചതിനാല് അദ്ദേഹത്തെ ഇന്ന് കോടതിയില് ഹാജരാക്കിയിരുന്നില്ല. പകരം ഓണ്ലൈനായാണ് കേസ് കോടതി പരിഗണിച്ചത്.