സമരാഗ്നിയിലെ ഫണ്ട് പിരിവ് : കോണ്‍ഗ്രസില്‍ വിവാദം, നാളത്തെ തെരഞ്ഞെടുപ്പ്‌ അവലോകന യോഗം പ്രക്ഷുബ്‌ദമാകും

തിരുവനന്തപുരം  : തെരഞ്ഞെടുപ്പ്‌ ഫലം പുറത്തുവരുന്നതിനു മുമ്പ്‌ തന്നെ തെരഞ്ഞെടുപ്പ്‌ ഫണ്ടിനെ ചൊല്ലി കോണ്‍ഗ്രസില്‍ വിവാദം. തെരഞ്ഞെടുപ്പില്‍ മത്സരിച്ചവര്‍ക്ക്‌ കെ.പി.സി.സി. പണം നല്‍കിയില്ലെന്നു പരാതി.മുന്‍ കാലങ്ങളില്‍ സ്‌ഥാനാര്‍ഥികള്‍ക്ക്‌ കെ.പി.സി.സിയുടെ വകയായി തെരഞ്ഞെടുപ്പ്‌ ഫണ്ട്‌ നല്‍കുമായിരുന്നു. എന്നാല്‍ ഇത്തവണ ഒരു രൂപ പോലും നല്‍കിയില്ലെന്നാണ്‌ ആക്ഷേപം. നാളെ ചേരുന്ന തെരഞ്ഞെടുപ്പ്‌ അവലോകന യോഗത്തില്‍ തെരഞ്ഞെടുപ്പ്‌ ഫണ്ട്‌ വിഷയം ഉന്നയിക്കാനാണ്‌ സ്‌ഥാനാര്‍ത്ഥികളുടെയും ഒരു വിഭാഗം കെ.പി.സി.സി. ഭാരവാഹികളുടെയും തീരുമാനം.

തെരഞ്ഞെടുപ്പിനുളള ഫണ്ട്‌ സമാഹരണം കൂടി ലക്ഷ്യമിട്ടാണു കെ.പി.സി.സി. പ്രസിഡന്റ്‌ കെ. സുധാകരന്റെയും പ്രതിപക്ഷ നേതാവ്‌ വി.ഡി. സതീശന്റെയും നേതൃത്വത്തില്‍ ‘സമരാഗ്നി’യെന്ന പേരില്‍ കാസര്‍ഗോഡ്‌ മുതല്‍ തിരുവനന്തപുരം വരെ ജാഥ നടത്തിയത്‌. ഓരോ മണ്ഡലം കമ്മറ്റിയും ഒരു ലക്ഷം രൂപ വീതം സമാഹരിക്കാനായിരുന്നു നിര്‍ദേശം. ഇതില്‍ അമ്പതിനായിരം കെ.പി.സി.സിക്കും 25,000 രൂപ ജില്ലാ കോണ്‍ഗ്രസ്‌ കമ്മറ്റിക്കും 15,000 രൂപ ബ്ലോക്ക്‌ കമ്മറ്റിയും 10,000 രൂപ മണ്ഡലം കമ്മറ്റിയും എടുക്കാനാണ്‌ നിര്‍ദേശം നല്‍കിയിരുന്നത്‌. ഇതനുസരിച്ച്‌ കെ.പി.സി.സിക്ക്‌ അഞ്ചു കോടിയോളം രൂപ ലഭിച്ചിരുന്നു.

കെ.പി.സി.സി. പ്രസിഡന്റിന്റെ നേരിട്ടുള്ള നിയന്ത്രണത്തിലാണു ഫണ്ട്‌ പിരിവ്‌ നടന്നത്‌. രണ്ടു കോടി രൂപയോളം ഫണ്ട്‌ പിരിവിനുള്ള കൂപ്പണ്‍ അടിക്കാനും ഒന്നര കോടി രൂപ ‘സമരാഗ്നി’യുടെ നടത്തിപ്പുകാരായ ഇവന്റ്‌ മാനേജ്‌മെന്റ്‌ ഗ്രൂപ്പിനും നല്‍കിയെന്നുമാണ്‌ കെ.പി.സി.സി. പ്രസിഡന്റ്‌ പറയുന്നതെന്ന്‌ സഹഭാരവാഹികള്‍ പറയുന്നു. ബാക്കി തുകയെപ്പറ്റി കെ.പി.സി.സി. നേതൃത്വം പറയുന്നില്ല.  കെ.പി.സി.സിയിലെ ഫണ്ട്‌ വിഷയം വിവാദമായ സാഹചര്യത്തില്‍ ഈ വിഷയം പരിഹരിക്കാതെ കെ. സുധാകരന്‌ ചുമതല കൈമാറാന്‍ തയാറാകരുതെന്നാണ്‌ കെ.പി.സി.സി. ഭാരവാഹികളില്‍ ഒരു വിഭാഗം ചൂണ്ടിക്കാട്ടുന്നത്‌.