പോയിന്‍റിനെ ചൊല്ലി തർക്കം; സ്‌കൂൾ കായിക മേള സമാപന ചടങ്ങിനിടെ സംഘർഷം

കൊച്ചി : സംസ്ഥാന സ്കൂൾ കായിക മേളയുടെ സമാപന ചടങ്ങിൽ പ്രതിഷേധം. സ്പോർട്സ് സ്കൂളുകളെ കിരീടത്തിനായി പരിഗണിച്ചതാണ് പ്രതിഷേധത്തിനിടയാക്കിയത്. പൊലീസും വിദ്യാർഥികളും തമ്മിൽ കൈയാങ്കളിയുണ്ടായി.

പോയിന്‍റ് നൽകിയതിലെ തർക്കമാണ് സംഘർഷത്തിൽ കലാശിച്ചത്. നാവാമുകുന്ദ, മാർ ബേസിൽ എന്നീ സ്കൂളുകളാണ് പ്രതിഷേധവുമായി രംഗത്തെത്തിയത്. സ്കൂളുകളുടെ വിഭാഗത്തിൽ 80 പോയന്‍റോടെ കടകശ്ശേരി ഐഡിയിൽ ഇഎച്ച്എസ്എസ് ആണ് ഒന്നാമതെത്തിയത്. ഔദ്യോഗിക സൈറ്റിലെ പോയിന്‍റ് ടോബിളിൽ 44 പോയന്‍റോടെ തിരുന്നാവായ നാവ മുകുന്ദ എച്ച്എസ്എസും 43 പോയിന്‍റുകളോടെ മാർബേസിലുമാണ് രണ്ടും മൂന്നും സ്ഥാനങ്ങളിൽ.

എന്നാൽ ഇവർക്കു പകരം ജി.വി. രാജാ സ്പോർട്സ് സ്കൂളിനാണ് രണ്ടാം സ്ഥാനം നൽരകിയത്. ഇതിനു പിന്നിൽ ഗൂഢാലേചനയുണ്ടെന്ന് ആരോപിച്ചാണ് വിദ്യാർഥികൾ പ്രതിഷേധിച്ചത്.

വിദ്യാർഥികളും മാതാപിതാക്കളും അധ്യാപകരുമടക്കം കടുത്ത പ്രതിഷേധമാണ് ഉയർത്തുന്നത്. സംഘർഷത്തെ തുടർന്ന് പൊലീസും വിദ്യാർഥികളും തമ്മിൽ കയ്യാങ്കളിയിലെത്തി. വിദ്യാഭ്യാസ മന്ത്രി വേദിയിൽ ഇരിക്കെയാണ് പ്രതിഷേധമുണ്ടായത്. മന്ത്രിയെ തടഞ്ഞ് വിദ്യാർഥികൾ പ്രതിഷേധിക്കാൻ ശ്രമിച്ചതോടെ പോലീസ് ഇടപെട്ട് മന്ത്രിയെ വേദിയിൽനിന്ന് മാറ്റി. പ്രതിഷേധത്തെതുടർന്ന് മേളയുടെ സമാപന ചടങ്ങ് വേഗത്തിൽ അവസാനിപ്പിച്ചു.

അതേസമയം, ട്രോഫി തിരികെ നൽകാൻ തയാറാണെന്ന് ജി.വി. രാജാ സ്കൂൾ അധികൃതർ അറിയിച്ചു. രണ്ടാം സ്ഥാനം ലഭിച്ചത് വേദിയിൽ പ്രഖ്യാപിച്ചപ്പോൾ മാത്രമാണ് അറിഞ്ഞതെന്നും ജി.വി. രാജാ സ്കൂൾ വ്യക്തമാക്കി.