തെരഞ്ഞെടുപ്പ് കാല ബജറ്റിലുണ്ടാകുമോ ആ പ്രഖ്യാപനം ? ഇന്ധനവിലയിൽ 10 രൂപയുടെ കുറവിന് കേന്ദ്രനീക്കം

ന്യൂഡൽഹി: ലോക്സഭാ തെരഞ്ഞെടുപ്പ് മുമ്പിൽ കണ്ട് പെട്രോൾ-ഡീസൽ വില കുറയ്ക്കാൻ കേന്ദ്രസർക്കാർ നീക്കം. പത്തു രൂപ വരെ കുറച്ചേക്കുമെന്നാണ് സർക്കാർ വൃത്തങ്ങളെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ടു ചെയ്യുന്നത്. തീരുമാനം കേന്ദ്ര ധനമന്ത്രാലയത്തിന്റെ അനുമതി കാത്തു കിടക്കുകയാണെന്ന് ന്യൂസ് 18 റിപ്പോർട്ടു ചെയ്തു. ഏപ്രില്‍-മെയ് മാസങ്ങളിലാണ് പൊതു തെരഞ്ഞെടുപ്പ്. കേന്ദ്ര സർക്കാരിന്റെ അവസാന ബജറ്റിൽ ജനപ്രിയ പ്രഖ്യാപനമെന്ന നിലയിൽ പെട്രോൾ-ഡീസൽ വിലക്കുറവ് വരുമെന്നാണ് പൊതുവിൽ വിലയിരുത്തുന്നത്.

അന്താരാഷ്ട്ര വിപണിയിൽ അസംസ്‌കൃത എണ്ണയുടെ വില കുറഞ്ഞിട്ടും ഇന്ധനവില കുറയ്ക്കാൻ കേന്ദ്രസർക്കാർ തയ്യാറായിരുന്നില്ല. മൂന്നു മാസമായി ക്രൂഡ് ഓയിൽ ബാരൽ ഒന്നിന്റെ വില 70-80 ഡോളറാണ്. ക്രൂഡ് ഓയിൽ വില കുറഞ്ഞത് എണ്ണക്കമ്പനികളുടെ നഷ്ടം കുറയ്ക്കാൻ ഇടയായിട്ടുണ്ട്. എണ്ണക്കമ്പനികളുടെ കണക്ക് അനുസരിച്ച് അന്താരാഷ്‌ട്ര മാർക്കറ്റിലെ തോത് അനുസരിച്ച് ഇന്ത്യയിൽ പെട്രോൾ വിലയിൽ 11 രൂപ വരെയും ഡീസൽ വിലയിൽ 6 രൂപ വരെയും കുറവ് വരുത്താവുന്നതാണ്. ജനുവരി 19 വരെയുള്ള കണക്കാണിത്. കഴിഞ്ഞ വർഷം മെയിലാണ് ഇതിന് മുമ്പ് പെട്രോൾ-ഡീസൽ വിലയിൽ കുറവു വരുത്തിയത്. അന്ന് പെട്രോളിന്റെ എക്‌സൈസ് നികുതിയിൽ എട്ടു രൂപയും ഡീസൽ നികുതിയിൽ ആറ് രൂപയുമാണ് കുറച്ചത്. വില കുറയ്ക്കാൻ സാധ്യതയുണ്ടെന്ന റിപ്പോർട്ടുകളെ തുടർന്ന് ഹിന്ദുസ്ഥാൻ പെട്രോളിയം, ഭാരത് പെട്രോളിയം, ഇന്ത്യൻ ഓയിൽ എന്നിവയുടെ ഓഹരിയിൽ ഇടിവു രേഖപ്പെടുത്തി.