കാലിക്കറ്റ്​ സർവകലാശാല പിജി പരീക്ഷാ ചോദ്യപേപ്പർ ചോർന്നതായി ആരോപണം

കോഴിക്കോട് ​: കാലിക്കറ്റ് സർവകലാശാല ഒന്നാം വർഷ പിജി പരീക്ഷയുടെ ചോദ്യപേപ്പർ ചോർന്നതായി ആരോപണം. ജനുവരി ഒന്നിന് നടന്ന ബിരുദാനന്തര ബിരുദ പരീക്ഷയുടെ ചോദ്യപേപ്പർ ചോർന്നതായാണ് ആരോപണം.

പരീക്ഷ തുടങ്ങുന്നതിന്​ രണ്ടു മണിക്കൂർ മുമ്പ് കോളജുകൾക്ക് ചോദ്യപേപ്പർ നൽകണമെന്നാണ് ചട്ടം. എന്നാൽ, പല കോളജുകൾക്കും പരീക്ഷ തുടങ്ങി അരമണിക്കൂറിന് ശേഷമാണ് ചോദ്യപേപ്പർ ലഭിച്ചത്.

ചില കോളജുകൾക്ക് പരീക്ഷ തുടങ്ങും മുമ്പ് ചോദ്യപേപ്പർ ലഭിച്ചു. ഇത് സംശയാസ്​പദമാണെന്ന്​ സിൻഡിക്കേറ്റ് അംഗം ഡോ. റഷീദ് അഹമ്മദ് ചൂണ്ടിക്കാട്ടുന്നു. സംഭവത്തിൽ അന്വേഷണം ആവശ്യപ്പെട്ട് അദ്ദേഹം വൈസ് ചാൻസലർക്ക് പരാതി നൽകി.