ബൈജൂസിന്റെ ഓഹരി നിക്ഷേപം എഴുതിത്തള്ളി ഡച്ച് സ്ഥാപനം

ന്യൂഡൽഹി:  എഡ്യൂടെക് കമ്പനിയായ ബൈജൂസിന്റെ ഓഹരി നിക്ഷേപം എഴുതിത്തള്ളി ഡച്ച് ആസ്ഥാനമായി പ്രവർത്തിക്കുന്ന നിക്ഷേപ സ്ഥാപനമായ പ്രൊസസ്. കുറച്ചു നാളുകളായി കടുത്ത പ്രതിസന്ധികൾ നേരിടുന്ന ബൈജൂസിന്റെ ഓഹരി മൂല്യം കുത്തനെ ഇടിഞ്ഞിരുന്നു. ബൈജൂസിലെ നിക്ഷേപത്തിലൂടെ 493 മില്യൺ ഡോളറിന്റെ നഷ്ടമുണ്ടായതായി പ്രൊസസിന്റെ വാർഷിക റിപ്പോർട്ടിൽ പറയുന്നു. 9.6 ശതമാനം ഓഹരികളാണ് ബൈജൂസിൽ കമ്പനിക്കുണ്ടായിരുന്നത്. ബൈജൂസിന്റെ ഡയറക്ടർ ബോർഡിൽനിന്ന് 2023 ജൂലായിൽ പ്രൊസസിന്റെ പ്രതിനിധിയായ റസ്സൽ ഡ്രെസെൻസ്റ്റോക്ക് രാജിവെച്ചിരുന്നു.സാമ്പത്തിക പ്രതിസന്ധിയെത്തുടർന്ന് ബൈജൂസിന്റെ ബംഗളൂരുവിലെ ആസ്ഥാനം ഒഴികെയുള്ള ഓഫീസുകൾ മുമ്പ് അടച്ചുപൂട്ടിയിരുന്നു.