കേന്ദ്രത്തിന്റെ സാമ്പത്തിക ഉപരോധത്തിലും കേരളം തളർന്നില്ല, അവഗണന തുടര്‍ന്നാല്‍പ്ലാന്‍ ബി – കെ.എൻ ബാലഗോപാൽ

തിരുവനന്തപുരം :കേന്ദ്രം സാമ്പത്തിക ഉപരോധം ഏർപ്പെടുത്തിയിട്ടും കേരളം തകർന്നില്ലെന്ന് ധനമന്ത്രി കെ.എൻ ബാലഗോപാൽ. തകരില്ല കേരളം തളരില്ല കേരളം.. തകർക്കാനാകില്ല കേരളത്തെ എന്നുറപ്പിച്ചാണ് മുന്നേറുന്നത്. കേരളത്തിന്റെ സമ്പദ് ഘടന സൂര്യോദയം സമ്പദ്ഘടനയായി മാറിയതായും ബാലഗോപാൽ ബജറ്റ് പ്രസംഗത്തിൽ പറഞ്ഞു. 

കേരളത്തിന്റെ സ്ഥാനം രാജ്യത്തിന്റെ മുൻനിരയിലാണ് . കേരളം മുടിഞ്ഞെന്ന് പറയുന്നവരെ നിരാശപ്പെടുത്തുന്നതാണ് കണക്കുകൾ. നാട് മികച്ച നേട്ടങ്ങൾ കൈവരിക്കുന്നു.ഒന്നാം പിണറായി സര്‍ക്കാരിന്റെ കാലത്ത് തുടങ്ങിയ ശ്രമങ്ങൾ ഫലം കണ്ട് തുടങ്ങി. കേരളം ഒട്ടേറെ മാറി. കേന്ദ്രം സാമ്പത്തിക ഉപരോധത്തിൽ വിറങ്ങലിച്ച് നിൽക്കുകയല്ല വേണ്ടത്, തകരില്ല കേരളം തളരില്ല കേരളം എന്ന് വ്യക്തമാക്കി മുന്നോട്ട് പോകണം-ബജറ്റ് പ്രസംഗത്തിന്റെ ആമുഖത്തിൽ കേന്ദ്ര സർക്കാരിനെതിരെ കടന്നാക്രമിച്ചു കൊണ്ട് ബാലഗോപാൽ പറഞ്ഞു.

കേന്ദ്ര സര്‍ക്കാരിന്റെ അവഗണന തുടര്‍ന്നാല്‍ പ്ലാന്‍ ബിയുമായി മുന്നോട്ടു പോകുമെന്ന് സംസ്ഥാന ധനമന്ത്രി. വികസന ക്ഷേമ പ്രവര്‍ത്തനങ്ങളുമായി മുന്നോട്ടു പോകുമെന്ന് അദ്ദേഹം വ്യക്തമാക്കി. കേന്ദ്രത്തിന്റെ വെട്ടിക്കുറവുകള്‍ വീണ്ടും വര്‍ദ്ധിക്കുന്നുവെന്നും കേരള മാതൃകയെ തകര്‍ക്കാനുള്ള ഗൂഢാലോചനയാണ് നടക്കുന്നതെന്നും അദ്ദേഹം ചൂണ്ടിക്കാട്ടി. ക്ഷേമപ്രവര്‍ത്തനങ്ങള്‍ മുടക്കണം എന്നതാണ് ഇത്തരം പ്രവര്‍ത്തികളുടെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.