ആലപ്പുഴ : പക്ഷിപ്പനി വ്യാപനത്തിൻ്റെ പശ്ചാത്തലത്തിൽ ആലപ്പുഴ ജില്ലയിൽ 2025 വരെ താറാവിനെയും കോഴികളെയും വളർത്താൻ പാടില്ലെന്ന് വിദഗ്ധ സമിതി നിർദേശം . പക്ഷിപ്പനിക്ക് കാരണമായത് പ്രത്യേക വൈറസാണെന്നും കുട്ടനാട് മാത്രമല്ല, ആലപ്പുഴ ജില്ലയിലെ എല്ലാ താലൂക്കുകളിലേക്കും വൈറസ് പടർന്നുപിടിച്ചുവെന്നും റിപ്പോർട്ടിൽ പറയുന്നതായി മൃഗസംരക്ഷണ വകുപ്പ് മന്ത്രി ജെ ചിഞ്ചുറാണി. 

പുതിയ ബാച്ചുകളുടെ ഇറക്കുമതിക്ക് ആലപ്പുഴ ജില്ല കൂടാതെ കോട്ടയം, പത്തനംതിട്ട ജില്ലകളിലെ വിവിധ താലൂക്കുകളിലും നിരോധനമുണ്ട്. പത്തനംതിട്ട ജില്ലയിലെ അടൂർ താലൂക്കിലും കോട്ടയം ജില്ലയിലെ വൈക്കം താലൂക്കിലുമാണ് നിയന്ത്രണമുള്ളത്. ഇവിടങ്ങളിൽ പൂർണമായി നിരോധനം ഉണ്ടാകില്ല. ആലപ്പുഴയിൽ മാത്രം പൂർണ നിരോധനം. കോട്ടയം, ചങ്ങനാശ്ശേരി, കോഴഞ്ചേരി, മല്ലപ്പള്ളി താലൂക്കുകളിലാണ് നിലവിൽ നിയന്ത്രണമുള്ളത്.

ആലപ്പുഴ, കോട്ടയം, പത്തനംതിട്ട ജില്ലകളിലാണ് പക്ഷിപ്പനി സ്ഥിരീകരിച്ചത്. നവംബർ, ഡിസംബർ മാസങ്ങളിൽ ദേശാടനപക്ഷികളുടെ വരവോടെയാണ് പക്ഷിപ്പനി ഉണ്ടാകാറുള്ളത്. പക്ഷിപ്പനി നിയന്ത്രിക്കാനായി ധ്രുതഗതിയിലിലുള്ള നടപടികളായിരുന്നു നടത്തിയിരുന്നത്. എന്നാൽ ഇത്തവണ പടർന്നുപിടിച്ച പക്ഷിപ്പനിക്ക് കാരണമായത് പ്രത്യേകത വൈറസാണ്. കുട്ടനാട് മാത്രമല്ല, ആലപ്പുഴ ജില്ലയിലെ എല്ലാ താലൂക്കുകളിലേക്കും വൈറസ് പടർന്നുപിടിച്ചുവെന്ന് മന്ത്രി പറഞ്ഞു.

പ്രാവ്, കൊക്ക്, കാക്ക, മയിൽ എന്നീ പറക്കുന്ന പക്ഷികളിൽ പോലും പക്ഷിപ്പനി കണ്ടെത്തി. ഒരു കിലോമീറ്റർ ചുറ്റളവിലുള്ള എല്ലാ പക്ഷികളെയും കൊന്നൊടുക്കിയും 10 കിലോമീറ്റർ ചുറ്റളവിൽ നിയന്ത്രണം ഏർപ്പെടുത്തിയുമാണ് മുന്നോട്ടുപോയത്. ഒരു പക്ഷേ ആലപ്പുഴ ജില്ലയിൽ 2025 വരെ താറാവിനെയും കോഴികളെയും വളർത്താൻ പാടില്ല എന്ന തരത്തിലേക്കുള്ള റിപ്പോർട്ടാണ് ലഭിച്ചിരിക്കുന്നത്.

കൊല്ലുന്ന വലിയ കോഴി, താറാവ് എന്നിവക്ക് 200 രൂപയും, 2 മാസം പ്രായമുള്ളവക്ക് 100 രൂപയും, മുട്ടക്ക് ഒന്നിന്  5 രൂപയും നഷ്ടപരിഹാരം നല്‍കാന്‍ സര്‍ക്കാര്‍ തീരുമാനിച്ചു. കര്‍ഷകര്‍ക്ക് നല്‍കാനുള്ള നഷ്ടപരിഹാര ഇനത്തില്‍ സംസ്ഥാനത്തിന് കേന്ദ്രത്തില്‍ നിന്ന് 6.2 കോടി ലഭിക്കാനുണ്ട്. പാലോട് വെറ്റിനറി ലാബ് മൂന്നാം ലെവല്‍ ലാബായി ഉയര്‍ത്തണമെന്നും കേരളം കേന്ദ്രത്തോട് ആവശ്യപ്പെട്ടു.