തെരുവിലെ പാട്ടുകാരനല്ല, ഏഷ്യാനെറ്റ് ന്യൂസ് കണ്ടെത്തിയ മനോജ് ഇനി സിനിമാ പാട്ടുകാരൻ!

തൃശൂർ : തൃശൂർ ആനായിക്കല്‍ സ്വദേശി മനോജ് ഇനി തെരുവിലെ പാട്ടുകാരനല്ല, സിനിമാ ഗായകൻ. കുന്നംകുളം സ്റ്റാന്‍ഡിൽ അലഞ്ഞുതിരിഞ്ഞു നടന്ന മനോജിനെ കണ്ടെത്തിയത് ഏഷ്യാനെറ്റ് ന്യൂസാണ്. ശശീന്ദ്ര സംവിധാനം നിര്‍വഹിക്കുന്ന ഓറ എന്ന സിനിമയില്‍ ഗാനം ആലപിക്കുന്നതിനാണ് മനോജിന് അവസരം ലഭിച്ചിരിക്കുന്നത്. മനോജിന്‍റെ സുഹൃത്തും ഗായകനുമായ പേരാമ്പ്ര സ്വദേശി ശ്രീജിത്ത് കൃഷ്ണയാണ് മനോജിന് സിനിമയില്‍ പാടാന്‍ അവസരം ലഭിച്ചകാര്യം ഫേയ്സ്ബുക്കിലൂടെ അറിയിച്ചത്. മനോജിന് ഇങ്ങനെയാരു അവസരം ലഭിച്ചതില്‍ ഒരുപാട് സന്തോഷമുണ്ടെന്നും പിന്തുണച്ച എല്ലാവര്‍ക്കും പ്രത്യേകിച്ച് ഏഷ്യാനെറ്റ് ന്യൂസിന് നന്ദിയുണ്ടെന്നും ശ്രീജിത്ത് കൃഷ്ണ പറഞ്ഞു.

ശ്യാംനാദ് പുനലൂര്‍ സംഗീത സംവിധാനം നിര്‍വഹിക്കുന്ന ഗാനത്തിന്‍റെ വരികള്‍ മാതാ അമൃതാനന്ദമയിയുടെ സഹോദരന്‍ സതീഷ് എടമണ്ണയിലാണ് എഴുതിയിരിക്കുന്നത്. ഓറ എന്ന സിനിമയുടെ സംവിധായകന്‍ ശശീന്ദ്ര വിളിച്ചാണ് മനോജിന് സിനിമയില്‍ പാടാനുള്ള അവസരം നല്‍കുമെന്ന് അറിയിച്ചതെന്ന് ശ്രീജിത്ത് കൃഷ്ണ പറഞ്ഞു. ഇരുപത് കൊല്ലം മുമ്പ് പാലക്കാട് ചെമ്പൈ സംഗീത കോളേജില്‍ തിളങ്ങിനിന്ന അനുഗ്രഹീത ഗായകനാണ് ആനായിക്കല്‍ സ്വദേശി മനോജ്. ഒരു പാട്ടു വീഡിയോ സമൂഹ മാധ്യമം വഴി കണ്ട് പഴയ സഹപാഠിയെ കണ്ടെത്തി തരുമോ എന്ന് ശ്രീജിത്ത് കൃഷ്ണ ഫേയ്സ്ബുക്കില്‍ പോസ്റ്റിട്ടതാണ് സംഭവങ്ങളുടെ തുടക്കം. ഏഷ്യാനെറ്റ് ന്യൂസ് നൽകിയ വാർത്തയെ തുടർന്ന് തനിക്ക് ലഭിച്ച അവസരങ്ങൾക്ക് ‘എല്ലാവരോടും നന്ദി’ എന്നാണ് മനോജ് ചാനലിലൂടെ അറിയിച്ചത്. സന്തോഷത്തിൽ മനോജ് പ്രേക്ഷകർക്കായി പാട്ടും പാടി.