സുപ്രീംകോടതി കൊളീജിയം ശുപാർശ നൽകി, ആശിഷ് ജെ. ദേശായി കേരള ചീഫ് ജസ്റ്റിസാകും

ന്യൂഡൽഹി: കേരള ഹൈക്കോടതി ചീഫ് ജസ്റ്റിസായി ഗുജറാത്ത് ഹൈക്കോടതി ആക്‌ടിംഗ് ചീഫ് ജസ്റ്റിസ് ആശിഷ് ജെ. ദേശായിയെ ശുപാർശ ചെയ്‌ത് സുപ്രീംകോടതി കൊളീജിയം. കേന്ദ്ര സർക്കാരിനാണ് ശുപാർശ നൽകിയത്. നിലവിലെ ചീഫ് ജസ്റ്റിസ് എസ്.വി. ഭട്ടിയെ സുപ്രീംകോടതി ജഡ്‌ജിയായി ശുപാർശ ചെയ്ത ഒഴിവിലാണിത്.

ഹൈക്കോടതി ചീഫ് ജസ്റ്റിസുമാരിൽ ഗുജറാത്ത് ഹൈക്കോടതിക്ക് പ്രാതിനിധ്യമില്ലെന്ന് ചൂണ്ടിക്കാട്ടിയാണ് ആശിഷ് ദേശായിയെ ശുപാർശ ചെയ്‌തത്. 2011 നവംബർ 21നാണ് ഹൈക്കോടതി ജഡ്‌ജിയായത്. 1962 ജൂലായ് അഞ്ചിന് വഡോദരയിലാണ് ജനനം. പിതാവ് ജിതേന്ദ്ര പി. ദേശായി ഗുജറാത്ത് ഹൈക്കോടതി ജഡ്‌ജിയായിരുന്നു.