ലിവർപൂളിന് സമനില, ഒന്നാം സ്ഥാനത്തെത്തി ആർസനൽ, സിറ്റിക്കും ജയം

70 പോയിന്റുമായി ആർ‍സനലും ലിവർപൂളും. 69 പോയിന്റുമായി മാഞ്ചസ്റ്റർ സിറ്റി. 7 മത്സരങ്ങൾ ശേഷിക്കെ പ്രീമിയർ ലീ​ഗിൽ കിരീട പോരാട്ടത്തിന് കടുപ്പമേറുകയാണ്. ഇന്നലെ നടന്ന മത്സരത്തിൽ യുണൈറ്റഡ് ലിവർപൂളിനെ സമനിലയിൽ കുരുക്കിയതോടെ ബ്രൈറ്റണെ തോൽപ്പിച്ച ആർസനൽ ലീഗിൽ ഒന്നാമതെത്തി. ​ഗോൾ കൂടുതൽ നേടിയതാണ് ​ഗണ്ണേഴ്സിന് അനുകൂലമായത്. ക്രിസ്റ്റൽ പാലസിനെ തോൽപ്പിച്ച സിറ്റിയും കിരീട പോരാട്ടത്തിൽ പിന്നോട്ടില്ലെന്ന വ്യക്തമായ സൂചന നൽകുന്നതായി ഇന്നലത്തെ മത്സരം.

ഓൾഡ് ട്രാഫോർഡിൽ രണ്ട് ​ഗോൾ വീതം നേടിയാണ് ഇരു ടീമുകളും സമനില പാലിച്ചത്. ലിവർപൂളിനായി ലൂയിസ് ഡിയാസും മുഹമ്മദ് സലായും ​ഗോൾ നേടി. യുണൈറ്റഡിന്റെ മറുപടി ബ്രൂണോ ഫെർണാണ്ടസിന്റെയും മാർകസ് റാഷ്ഫോഡിന്റെയും ​ഗോളിലൂടെയായിരുന്നു. ആധികാരികമായിരുന്നു ആർസനലിന്റെ വിജയം. സാക്ക, ഹാവേർട്സ്, ട്രൊസാർഡ് എന്നിവരുടെ ​ഗോളിൽ ബ്രൈറ്റന്റെ ​ഗ്രൗണ്ടിലായിരുന്നു ​ഗണ്ണേഴ്സിന്റെ മുന്നേറ്റം. ക്രിസ്റ്റൽ പാലസിന്റെ ​ഗ്രൗണ്ടിൽ മാഞ്ചസ്റ്റർ സിറ്റിയും വിജയം സ്വന്തമാക്കി. രണ്ട് ​ഗോൾ ഡിബ്രൂയ്നെ നേടിയപ്പോൾ റികോ ലെവിസും ഹാലണ്ടും ഓരോ ​ഗോൾ വീതം സ്വന്തമാക്കി. മറ്റ് മത്സരങ്ങളിൽ ടോട്ടനം വിജയിച്ചപ്പോൽ ചെൽസിയും ആസ്റ്റൻ വില്ലയും സമനിലയിൽ കുരുങ്ങി. ജയത്തോടെ ടോട്ടനം പോയിന്റ് പട്ടികയിൽ നാലാം സ്ഥാനത്തെത്തി.