ആലപ്പുഴ : എ.എ. റഹീം എംപിയുടെ വ്യാജ വീഡിയോ പ്രചരിപ്പിച്ച കേസിൽ ഒരാൾ അറസ്റ്റിൽ. ആറന്മുള കോട്ട സ്വദേശി അനീഷ്കുമാറിനെയാണ് ജാമ്യമില്ലാ വകുപ്പ് പ്രകാരം അറസ്റ്റ് ചെയ്തത്. മോന്‍സണ്‍ മാവുങ്കലിന്‍റെ പുരാവസ്തു ശേഖരത്തിലുള്ള സിംഹാസനത്തില്‍ റഹീം ഇരിക്കുന്നതായുള്ള വീഡിയോ ആണ് അനീഷ് ഫേസ്ബുക്കില്‍ പ്രചരിപ്പിച്ചത്. റഹീം ടിവി ചാനല്‍ ചര്‍ച്ചയില്‍ സംസാരിക്കുന്നതിന്‍റെ ദൃശ്യങ്ങള്‍ ഉള്‍പ്പെടെയുള്ള വീഡിയോ ആണ് സിംഹാസനത്തിന്‍റെ ചിത്രവുമായി ചേര്‍ത്ത് പ്രചരിപ്പിച്ചത്. അനീഷ് ഉള്‍പ്പെടെ മൂന്ന് പേര്‍ക്കെതിരെയാണ് റഹീം പോലീസിൽ പരാതി നൽകിയത്.എംപിയുടെ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത ചെറുതുരുത്തി പോലീസ് ശനിയാഴ്ച പുലര്‍ച്ചെ മൂന്ന് മണിയോടെ ആറന്മുള കോട്ടയിലെ വീട്ടില്‍ നിന്നുമാണ് അനീഷിനെ കസ്റ്റഡിയില്‍ എടുത്തത്. മുന്‍പ് ഗള്‍ഫില്‍ ജോലി ചെയ്തിരുന്ന അനീഷ് ബിജെപി പ്രവര്‍ത്തകനാണ്. ഇയാളുടെ ഭാര്യ ഗള്‍ഫില്‍ ജോലി ചെയ്യുകയാണ്. അനീഷ് കോട്ട എന്ന സ്വന്തം ഫേസ് ബുക്ക് അക്കൗണ്ട് വഴി ആയിരുന്നു പോസ്റ്റ് ചെയ്തത്. ഇതിനു വലിയ തോതിലുള്ള കാഴ്ച്ചക്കാരും ഉണ്ടായതോടെ ആണ് എം പി പോലീസിൽ പരാതി നൽകിയത്.
