അമൃത ആശുപത്രിയുടെ നേതൃത്വത്തിൽ “അപസ്മാര സാന്ത്വനം” സൗജന്യ മെഡിക്കൽ ക്യാമ്പ് സംഘടിപ്പിച്ചു; നൂറോളം രോഗികൾ പങ്കെടുത്തു

തൊടുപുഴ : അമൃത ആശുപത്രിയും ബഹിരാകാശ വകുപ്പിന് കീഴിലുള്ള ന്യൂസ്‌പേസ് ഇന്ത്യ ലിമിറ്റഡും (NSIL) ചേർന്ന് തൊടുപുഴ ലയൺസ് ക്ലബ്ബിന്റെ സഹകരണത്തോടെ “അപസ്മാര സാന്ത്വനം” സൗജന്യ മെഡിക്കൽ ക്യാമ്പ് സംഘടിപ്പിച്ചു. തൊടുപുഴ പ്രൈവറ്റ് ബസ് സ്റ്റാൻഡിന് സമീപമുള്ള ലയൺസ് ക്ലബ് ഹാളിൽ വെച്ച് നടന്ന മെഡിക്കൽ ക്യാമ്പ് തൊടുപുഴ എം.എൽ.എ പി.ജെ. ജോസഫ് ഉദ്ഘാടനം ചെയ്തു.

തൊടുപുഴ ലയൺസ് ക്ലബ് പ്രസിഡന്റ് ഡോ. മെർലിൻ ഏലിയാസ് ചടങ്ങിൽ അധ്യക്ഷത വഹിച്ചു. അമൃത ആശുപത്രി ന്യൂറോളജി വിഭാഗം മേധാവിയും അമൃത സ്കൂൾ ഓഫ് മെഡിസിൻ വൈസ് പ്രിൻസിപ്പൽ ഡോ. ആനന്ദ് കുമാർ സ്വാഗതപ്രസംഗം നടത്തി. തൊടുപുഴ ഡി.വൈ.എസ്.പി പി.കെ സാബു, അസിസ്റ്റന്റ് മോട്ടോർ വെഹിക്കിൾ ഇൻസ്‌പെക്ടർ രാംദേവ് പി.ആർ, കൊച്ചി അമൃത ആശുപത്രിയിലെ ന്യൂറോളജി വിഭാഗം പ്രൊഫസർ ഡോ. അശോക് പിള്ളൈ, ലയൺസ് ക്ലബ് എപ്പിലെപ്സി പ്രോജക്ട് ഹെഡ് ഡോ. സുദർശൻ, വൈസ് ഡിസ്ട്രിക്ട് ഗവർണർ ജയേഷ്.വി.എസ്. എന്നിവർ വിശിഷ്ടാതിഥികളായി പങ്കെടുത്തു. അമൃത അഡ്വാൻസ്ഡ് സെന്റർ ഫോർ എപ്പിലെപ്സി പ്രോഗ്രാം ഡയറക്ടറും ന്യൂറോളജി വിഭാഗം മേധാവിയുമായ ഡോ. സിബി ഗോപിനാഥ് ചടങ്ങിന് കൃതജ്ഞത രേഖപ്പെടുത്തി.

കേരളത്തിന്റെ വിവിധ ഭാഗങ്ങളിൽ നിന്നായി എത്തിയ നൂറോളം രോഗികൾ ക്യാമ്പിൽ പങ്കെടുത്തു. സാമ്പത്തികമായി പിന്നോക്കം നിൽക്കുന്ന രോഗികൾക്ക് സൗജന്യ പരിശോധനയും അപസ്‌മാര ശസ്ത്രക്രിയക്ക് മുന്നോടിയായുള്ള വിദഗ്ദ്ധ പരിശോധനകളും ക്യാമ്പിന്റെ ഭാഗമായി നടന്നു. രോഗികൾക്കും ബന്ധുക്കൾക്കുമായി സംഘടിപ്പിച്ച “ഡോക്ടറോട് ചോദിക്കാം” എന്ന സെഷൻ ഏറെ ശ്രദ്ധേയമായി. ഇതിലൂടെ അപസ്മാരത്തെക്കുറിച്ചുള്ള സംശയങ്ങൾക്ക് വിദഗ്ദ്ധ ഡോക്ടർമാർ മറുപടി നൽകി.

ലയൺസ് ക്ലബ് ഭാരവാഹികളും അമൃത ആശുപത്രിയിലെ ആരോഗ്യ പ്രവർത്തകരും ക്യാമ്പിന് നേതൃത്വം നൽകി. മെഡിക്കൽ ക്യാമ്പിന് വേണ്ട സഹായങ്ങൾ ചെയ്ത തൊടുപുഴയിലെ സാമൂഹ്യ പ്രവർത്തകരായ നിഥിൻ ടോം, മാർട്ടിൻ.എൻ.എസ്., അജയ് ഉണ്ണി എന്നിവരെ ചടങ്ങിൽ ആദരിച്ചു.

Byte By

1. P.J Joseph, MLA, Thodupuzha

2. Ramdev.P.R., Assistant Motor Vehicle Inspector, Thodupuzha