ഭാര്യയേയും അമ്മയേയുമടക്കം കുടുംബത്തിലെ 8 പേരെ വെട്ടിക്കൊലപ്പെടുത്തിയ ശേഷം യുവാവ് ആത്മഹത്യ ചെയ്തു

ഭോപ്പാൽ : മധ്യപ്രദേശിൽ കുടുംബത്തിലെ 8 പേരെ വെട്ടിക്കൊലപ്പെടുത്തിയ ശേഷം യുവാവ് ആത്മഹത്യ ചെയ്തു. ചിന്ദ്വാരയിലെ ബോഡൽ കച്ചാർ ഗ്രാമത്തിലാണ് കൂട്ടക്കൊല നടന്നത്. ദിനേശ് എന്ന 27കാരനാണ് ഭാര്യയേയും അമ്മയേയുമടക്കം കുടുംബത്തിലെ 7 പേരെ കൊലപ്പെടുത്തിയത്. കൊല്ലപ്പെട്ടവരിൽ 3 കുട്ടികളുമുണ്ട്. പുലർച്ചെ രണ്ടരയോടെയായിരുന്നു സംഭവം. ദിനേശിന്റെ ഭാര്യ വർഷ ബായ്, അമ്മ സിയ, ദിനേശിന്റെ മൂത്ത സഹോദരൻ ശ്രാവൺ കുമാർ, ശ്രാവണിന്റെ ഭാര്യ ബരാതോ, ദിനേശിന്റെ ഇളയ സഹോദരി പാർവതി, ശ്രാവണിന്റെ 3 മക്കൾ എന്നിവരാണ് കൊല്ലപ്പെട്ടത്. 

എട്ടുപേരെയും ഉറങ്ങിക്കിടന്നപ്പോൾ മഴു കൊണ്ട് വെട്ടിക്കൊലപ്പെടുത്തുകയായിരുന്നു. കുടുംബത്തിലെ മറ്റ് അം​ഗങ്ങളെയും കൊല്ലാനായിരുന്നു ദിനേശിന്റെ ശ്രമമെന്ന് രക്ഷപെട്ട ബന്ധുക്കൾ പറഞ്ഞു. വീട്ടിലെ മറ്റ് അം​ഗങ്ങൾ ഉണർന്നതോടെ ഇയാൾ രക്ഷപെട്ടു. തുടർന്ന് നടത്തിയ തിരച്ചിലിലാണ് വീടിനു സമീപമുള്ള മരത്തിൽ തൂങ്ങി മരിച്ച നിലയിൽ കണ്ടെത്തിയത്. കൊലപാതകത്തിന്റെ കാരണം വ്യക്തമല്ല. ദിനേശ് ഒരു വർഷം മുമ്പ് മാനസികാസ്വാസ്ഥ്യത്തിന് ചികിത്സ തേടിയിരുന്നു. തുടർന്ന് ഇയാൾ പഴയ നിലയിലായിരുന്നുവെന്ന് ബന്ധുക്കൾ പറഞ്ഞു. 8 ദിവസം മുമ്പാണ് ഇയാൾ വിവാഹിതനായത്.