സ്വമ്മിന് ശേഷം കാൻ ഫെസ്റ്റിവലിൽ ഔദ്യോഗിക മത്സര വിഭാഗത്തിലെ ഇന്ത്യൻ എൻട്രിയായി ആൾ വി ഇമാജിൻ ആസ് ലൈറ്റ്

കാൻ ഫിലിം ഫെസ്റ്റിവലിൽ 30 വർഷത്തിന് ശേഷം ഔദ്യോഗിക മത്സരവിഭാഗത്തിൽ ഒരു ഇന്ത്യൻ സിനിമ എത്തിയ ആഹ്ലാദം പങ്കുവെച്ച് സംവിധായകൻ ഡോ.ബിജു. മലയാളികളായ കനി കുസൃതിയും ദിവ്യ പ്രഭയും അഭിനയിച്ച ആൾ വി ഇമാജിൻ ആസ് ലൈറ്റ് ആണ് സ്വമ്മിനു ശേഷം ഈ വിഭാഗത്തിൽ കാനിലെത്തുന്ന ആദ്യ ഇന്ത്യൻ സിനിമ. പായൽ കപാഡിയയാണ് ചിത്രത്തിൻറെ സംവിധായക. ചിത്രത്തെക്കുറിച്ചും ഈ നേട്ടം കേരളത്തിൽ ശ്രദ്ധിക്കാതെ പോകുന്നതിനെകുറിച്ചും ഡോ ബിജു എഴുതിയ കുറിപ്പ് വായിക്കാം

കുറിപ്പിന്റെ പൂർണ രൂപം

ഇന്നലെ ആരംഭിച്ച കാൻസ് ചലച്ചിത്ര മേളയിൽ 30 വർഷത്തിന് ശേഷം ആദ്യമായി ഒരു ഇന്ത്യൻ സിനിമ ഔദ്യോഗിക മത്സര വിഭാഗത്തിൽ തിരഞ്ഞെടുക്കപ്പെട്ടിരിക്കുക ആണ് . പായൽ കപാഡിയ സംവിധാനം ചെയ്ത “All We Imagine as Light “ . 30 വർഷങ്ങൾക്ക് മുൻപ് മത്സര വിഭാഗത്തിൽ ഇന്ത്യയിൽ നിന്നും തിരഞ്ഞെടുത്തത് ഒരു മലയാള സിനിമ ആയിരുന്നു . ഷാജി എൻ കരുൺ സംവിധാനം ചെയ്ത swaham (സ്വം ) എന്ന മലയാള സിനിമ .

മുപ്പത് വർഷങ്ങളുടെ ദീർഘമായ ഇടവേളയ്ക്ക് ശേഷം വീണ്ടും ഒരു ഇന്ത്യൻ സിനിമ കാനിൽ മത്സര വിഭാഗത്തിൽ ഇടം നേടുമ്പോഴും മലയാളത്തിന് അഭിമാനിക്കാം . സിനിമയിലെ പ്രധാനപ്പെട്ട ഭാഷ മലയാളം ആണ് . അതിനുമപ്പുറം മലയാളത്തിലെ രണ്ടു നടിമാർ ആണ് ഈ ചിത്രത്തിലെ പ്രധാന നായികമാർ . കനി കുസൃതിയും , ദിവ്യ പ്രഭയും ….കാനിലെ റെഡ് കാർപ്പറ്റിലൂടെ മത്സര വിഭാഗത്തിലുള്ള ഒരു സിനിമയെ പ്രതിനിധീകരിച്ചു രണ്ടു മലയാള താരങ്ങൾ നടന്നു കയറുന്നത് മലയാള സിനിമയ്ക്കും കേരളത്തിനും അഭിമാനകരം ആണ് . എല്ലാ വിധ അഭിനന്ദനങ്ങളും പായൽ കപാഡിയ , കനി കുസൃതി , ദിവ്യ പ്രഭ . നിങ്ങൾ ഇന്ത്യയുടെ അഭിമാനം മാത്രമല്ല മലയാള സിനിമയുടെ അഭിമാനം കൂടി ആണ് ലോകത്തിനു മുന്നിൽ ഉയർത്തിപ്പിടിക്കുന്നത് ..എല്ലാ ആശംസകളും …

മലയാളത്തിന് ഏറെ അഭിമാനം പകരുന്ന ഈ നേട്ടത്തെ അഭിനന്ദിച്ചു കൊണ്ട് ചലച്ചിത്ര അക്കാദമിയുടെയോ , സാംസ്കാരിക വകുപ്പിന്റെയോ , മന്ത്രിയുടെയോ ഒരു കുറിപ്പ് പോലും ഇതുവരെ കണ്ടില്ല . ഏതെങ്കിലും സിനിമാ സംഘടനകളും അഭിനന്ദന കുറിപ്പ് പുറത്തിറക്കി കണ്ടില്ല ( എന്റെ ശ്രദ്ധയിൽ പെടാത്തത് ആണെങ്കിൽ ക്ഷമ ). നമ്മുടെ മുഖ്യ ധാരാ മാധ്യമങ്ങളും ഈ വലിയ വാർത്ത അർഹമായ പ്രാധാന്യത്തോടെ പ്രസിദ്ധീകരിച്ചിട്ടുണ്ടോ എന്നതും സംശയം . (കേരള കൗമുദി ദിനപ്പത്രത്തിൽ ഒരു വലിയ വാർത്ത പ്രസിദ്ധീകരിച്ചിരുന്നു ) എതായാലും അന്താരാഷ്ട്ര തലത്തിൽ സിനിമയ്ക്ക് വലിയ വാർത്തകളും ശ്രദ്ധയും ലഭിക്കുന്നുണ്ട് . കേരളത്തിൽ ചിലപ്പോൾ നമ്മുടെ ചലച്ചിത്ര അക്കാദമി ചെയർമാന്റെ അഭിപ്രായം പോലെ തിയറ്ററിൽ ആളെ കൂട്ടാത്ത സിനിമയൊക്കെ എന്ത് സിനിമ , എന്ത് കാൻ , ഏത് കാൻ , തിയറ്ററിൽ ആള് കയറാത്ത സിനിമയ്ക്ക് ഒക്കെ എന്ത് റെലവൻസ്‌ ..

അതു കൊണ്ടാകാം ചലച്ചിത്ര അക്കാദമി യും സാംസ്കാരിക വകുപ്പും ഒക്കെ ഈ വിവരം ഇതുവരെയും അറിയുകയോ അഭിനന്ദിക്കുകയോ ചെയ്യാതിരുന്നത് . സാരമില്ല ഇന്നലെ ഫെസ്റ്റിവൽ തുടങ്ങിയത് അല്ലേ ഉള്ളൂ അഭിനന്ദനത്തിനു ഒക്കെ ഇനിയും വേണമെങ്കിൽ ധാരാളം സമയം ഉണ്ട് ….