സുവർണാവസരങ്ങൾ നഷ്ടമാക്കി ബ്ലാസ്റ്റേഴ്സ് താരങ്ങൾ, സെമി കാണാതെ കൊമ്പന്മാർ പുറത്ത്

ഭുവനേശ്വർ: നോക്കൗട്ട് മത്സരത്തിൽ ഒഡീഷ എഫ്സിയോടു തോറ്റ് കേരള ബ്ലാസ്റ്റേഴ്സ് ഐഎസ്എല്‍ സെമി ഫൈനൽ കാണാതെ പുറത്ത്. ഒന്നിനെതിരെ രണ്ടു ഗോളുകൾക്കാണ് ഒഡീഷയുടെ കുതിപ്പ്. നിശ്ചിത സമയത്ത് 1–1ന് സമനിലയിലായ മത്സരം, എക്സ്ട്രാ ടൈമിലെ ഗോളിലൂടെയാണ് ഒഡീഷ പിടിച്ചെടുത്തത്. 67–ാം മിനിറ്റിൽ ഫെഡോർ ചെര്‍ണിച്ചിലൂടെ ബ്ലാസ്റ്റേഴ്സ് മുന്നിലെത്തിയപ്പോൾ, ഡിയേഗോ മൗറീഷ്യോ (87), ഐസക് റാൽട്ടെ (97) എന്നിവരിലൂടെ ആതിഥേയർ ഗോൾ മടക്കി. സെമിയിൽ മോഹന്‍ ബഗാൻ സൂപ്പർ ജയന്റ്സാണ് ഒഡീഷയുടെ എതിരാളികൾ.

ആദ്യ പകുതിയില്‍ മികച്ച നീക്കങ്ങള്‍ നടത്തിയത് ഒഡീഷ എഫ്സിയായിരുന്നു. 27–ാം മിനിറ്റിലാണ് ഒഡീഷ ആദ്യം വല കുലുക്കിയത്. കോർണർ കിക്കിൽനിന്ന് ലഭിച്ച പന്ത് കാലുകൊണ്ടു പിന്നിലേക്കു തട്ടിയിട്ട മൊർത്താഡ ഫാള്‍ ലക്ഷ്യം കണ്ടു. ഒന്നിലേറെ ഒഡീഷ താരങ്ങൾ ഓഫ് സൈഡ് ആയിരുന്നിട്ടും ഗോൾ നൽകുകയാണ് റഫറി ആദ്യം ചെയ്തത്. എന്നാൽ ക്യാപ്റ്റൻ ലെസ്കോവിച്ചിന്റെ നേത‍ൃത്വത്തിൽ ബ്ലാസ്റ്റേഴ്സ് താരങ്ങൾ ശക്തമായി പ്രതിഷേധിച്ചതോടെ റഫറി തീരുമാനം പിൻവലിച്ചു.

രണ്ടാം പകുതിയുടെ തുടക്കം മുതൽ ബ്ലാസ്റ്റേഴ്സിന്റെ ആക്രമണങ്ങളായിരുന്നു. 46–ാം മിനിറ്റിൽ ലഭിച്ച അവസരം ഫെഡോർ ചെർണിച്ച് പാഴാക്കി. 53–ാം മിനിറ്റിൽ പന്തുമായി ഒഡീഷ ബോക്സിലേക്കു മുന്നേറിയ ഐമന്റെ ഷോട്ട് പോസ്റ്റിൽ തട്ടിത്തെറിച്ചു. തൊട്ടുപിന്നാലെ ഫെഡോർ ചെർണിച്ച് എടുത്ത ഷോട്ട് പോസ്റ്റിനു ഭീഷണിയാകാതെ പുറത്തേക്കു പോയി. 67–ാം മിനിറ്റിൽ ചെര്‍ണിച്ചിലൂടെതന്നെ ബ്ലാസ്റ്റേഴ്സ് മുന്നിലെത്തി.

87-ാം മിനിറ്റിൽ ബ്ലാസ്റ്റേഴ്സ് പ്രതീക്ഷകൾക്കു തിരിച്ചടിയായി ഒഡീഷ സമനില ഗോൾ നേടി. പകരക്കാരനായി ഇറങ്ങിയ ഡിയേഗോ മൗറീഷ്യോയാണ് സമനില പിടിച്ച് മത്സരം എക്സ്ട്രാ ടൈമിലേക്കു നീട്ടിയത്. രണ്ടാം പകുതിയുടെ അവസാന മിനിറ്റുകളിൽ ഡാനിഷ് ഫറൂഖ്, മുഹമ്മദ് അസർ എന്നിവരെ ബ്ലാസ്റ്റേഴ്സ് കളിക്കാൻ ഇറക്കിയെങ്കിലും ലീഡെടുക്കാനായില്ല. എക്സ്ട്രാ ടൈമിലെ 97-ാം മിനിറ്റിൽ ഐസക് റാൽട്ടെയിലൂടെ ഒഡീഷ മത്സരത്തിലെ വിജയ​ഗോൾ സ്വന്തമാക്കുകയായിരുന്നു.