സ്വർണക്കടത്ത്: ​ഖജനാവിന് നഷ്ടം 3,000 കോടി​. അധിക നികുതി ഒഴിവാക്കണമെന്ന് വ്യാപാരികൾ​

കൊച്ചി: സ്വർണ വിലയിലെ വൻ വർധനയ്ക്കൊപ്പം ഇറക്കുമതി ചുങ്കത്തിലെ വർധനയും സ്വർണക്കടത്തിന്റെ തോത് ഉയരാൻ കാരണമാകുന്നതായി കണക്കുകൾ. 2004ൽ രണ്ടു ശതമാനമുണ്ടായിരുന്ന ഇറക്കുമതിച്ചുങ്കം നിലവിൽ 15% ആണ്. നിയമപരമല്ലാതെ സ്വർണം കടത്തിയാൽ ഒരു കിലോഗ്രാമിൽ 10 ലക്ഷം രൂപയുടെ ലാഭം നേടാമെന്നതാണ് കള്ളക്കടത്തുകാരെ ആകർഷിക്കുന്ന ഘടകം. സമാന്തര സ്വർണക്കച്ചവടം മൂലം സർക്കാർ ഖജനാവി​ലേക്ക് എത്താതെ പോകുന്നത് ഏകദേശം 3000 കോടി​ രൂപയുടെ നി​കുതി​യാണ്.

12.5% നികുതിയും 2.5% സെസും ചേർത്താണ് ഇറക്കുമതിച്ചുങ്കം ഈടാക്കുന്നത്. ഇതിനു പുറമേ 3% ജിഎസ്ടിയുമുണ്ട്. പ്രതി​വർഷം 800 മുതൽ 1000 ടൺ വരെ സ്വർണം നി​കുതി​യടച്ച് രാജ്യത്തേക്ക് കൊണ്ടുവരുന്നതായാണ് കണക്ക്. ഒരു കിലോഗ്രാം സ്വർണത്തിന് നികുതി ഉൾപ്പെടെ 75 ലക്ഷം രൂപയാണ് മൂല്യം. ഇതൊഴിവാക്കി കൊണ്ടുവന്നാൽ ലാഭം കുറഞ്ഞത് 10 ലക്ഷം രൂപയോളമാണ്. ഏകദേശം രണ്ടുലക്ഷം കോടി രൂപയുടേതാണു കേരളത്തിലെ അനധികൃത സ്വർണ വ്യാപാര മേഖല.

ഇന്ത്യയി​ലേക്കുള്ള സ്വർണക്കള്ളക്കടത്ത് കുറയണമെങ്കിൽ ഇറക്കുമതി​ച്ചുങ്കം എടുത്തുകളണമെന്ന് ഓൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ സംസ്ഥാന ട്രഷറർ എസ്.അബ്ദുൽ നാസർ പറയുന്നു. 3 കോടി രൂപയ്ക്കു മുകളിൽ മൂല്യമുള്ള സ്വർണം മാത്രമേ ഉദ്യോഗസ്ഥർ പിടിച്ചെടുക്കൂ. അതുകൊണ്ടുതന്നെ കാരി​യർമാർ ഭൂരി​ഭാഗവും ഈ പരി​ധി​ പാലി​ക്കും. പിടിക്കപ്പെട്ടാൽ നി​കുതി​ അടച്ചു രക്ഷപ്പെടും. കേന്ദ്ര സർക്കാർ ഇറക്കുമതി ചുങ്കം എടുത്തു കളയുകയോ, നികുതി 5% ആക്കുകയോ ചെയ്താൽ കള്ളക്കടത്ത് നിയന്ത്രിക്കാൻ കഴിയുമെന്നും ഇപ്പോൾ ലഭി​ക്കുന്ന നി​കുതി​ വരുമാനം വർധിക്കുമെന്നും അദ്ദേഹം പറയുന്നു.