ചിന്നസ്വാമിയിൽ കൊൽക്കത്തൻ അപ്രമാധിത്വം; ആരാധകർക്ക് മുമ്പിൽ ബെം​ഗളൂരുവിന് നിരാശ

ബെം​ഗളൂരു: ആദ്യം സുനിൽ നരെയ്നും ഫിൽ സാൾട്ടും. പിന്നീട് വെങ്കിടേഷ് അയ്യരും ശ്രേയസ് അയ്യരും. ഐപിഎല്ലിൽ ബെം​ഗളൂരുവിന്റെ 182 റൺസ് മറികടക്കാൻ കൊൽക്കത്തക്ക് വേണ്ടി വന്നത് നാലേ നാല് ബാറ്റർമാർ. വന്നവരെല്ലാം വെടിക്കെട്ട് നടത്തിയപ്പോൾ സൂപ്പർ താരം ആന്ദ്രേ റസലിനെ കാഴ്ചക്കാരനാക്കി കൊൽക്കത്തക്ക് 7 വിക്കറ്റിന്റെ ആധികാരിക ജയം. ആരാധകർക്ക് മുമ്പിൽ ഈ സീസണിൽ തോൽക്കുന്ന ആദ്യ ടീമായി ബെം​ഗളൂരു. അതും 19 പന്ത് ബാക്കി നിൽക്കെ. മുഹമ്മദ് സിറാജും യാഷ് ​ദയാലും അൽസാരി ജോസഫും പൊതിരെ തല്ലുവാങ്ങി.

സുനിൽ നരെയ്ൻ (22 പന്തിൽ 47), ഫിൽ സാൾട്ട് (22 പന്തിൽ 30) എന്നിവരുടെ വെടിക്കെട്ടിൽ പവർപ്ലേയിൽ തന്നെ കൊൽക്കത്ത 80ന് മുകളിൽ സ്കോർ ചെയ്തു. പിന്നാലെയെത്തിയ വെങ്കിടേഷ് അയ്യർ ( 30 പന്തിൽ 50), ശ്രയേസ് അയ്യർ (24 പന്തിൽ 39) എന്നിവരുടെ ബാറ്റിങ്ങിലൂടെ കൊൽക്കത്ത വിജയം പെട്ടെന്ന് എത്തിപ്പിടിക്കുകയായിരുന്നു. നേരത്തെ 83 റൺസെടുത്ത ​കോഹ്ലിയുടെ മികവിലാണ് ബെം​ഗളൂരു 182ൽ എത്തിയത്. ടൂർണമെന്റിൽ 181 റൺസുമായി ഓറഞ്ച് ക്യാപ്പ് കോഹ്ലി സ്വന്തമാക്കി. മിച്ചൽ സ്റ്റാർക്ക് നാല് ഓവറിൽ 47 റൺസ് വഴങ്ങി ഒരിക്കൽ കൂടി നിരാശപ്പെടുത്തി.