അരി തരിക, അല്ലെങ്കിൽ ഓപ്പൺ മാർക്കറ്റ്‌ ടെൻഡറിനുള്ള വിലക്ക് നീക്കുക; കേന്ദ്രത്തിനെതിരെ കേരളം കോടതിയിലേക്ക്

തിരുവനന്തപുരം : സംസ്ഥാന സർക്കാരിന്‌ അരി നൽകാതെ വോട്ടിനായി ഭാരത്‌ അരി വിതരണം ചെയ്യുന്ന കേന്ദ്രസർക്കാർ നടപടിക്കെതിരെ കേരളം കോടതിയെ സമീപിക്കാൻ ഒരുങ്ങുന്നു. കേരളത്തിന്‌ ആവശ്യമായ ഭക്ഷ്യധാന്യ വിഹിതം അനുവദിക്കാത്തതും ഓപ്പൺ മാർക്കറ്റ്‌ ടെൻഡറിൽ പങ്കെടുക്കുന്നതിൽനിന്ന്‌  സർക്കാരിനെയും സർക്കാർ ഏജൻസികളെയും വിലക്കിയതും പ്രതിസന്ധിയുണ്ടാക്കി.ഭാരത് അരിക്കായി കേരളത്തിലെ എഫ്.സി.ഐ ഗോഡൗണിൽ നിന്നുള്ള അരി എടുക്കുക കൂടി ചെയ്ത നീക്കമാണ് കേരളം കോടതിയിൽ ചോദ്യം ചെയ്യുക. 

എഫ്‌സിഐ ഗോഡൗണിൽനിന്ന്‌ നേരിട്ട്‌ ടെൻഡറിൽ പങ്കെടുത്ത്‌ ഭക്ഷ്യധാന്യങ്ങൾ വാങ്ങാനുള്ള അവസരം നിഷേധിച്ചാണ്‌ ഭാരത്‌ അരിക്കുള്ള സംഭരണം കേന്ദ്രസർക്കാർ നടത്തുന്നത്‌. ഇതുമൂലം സപ്ലൈകോയും കൺസ്യൂമർഫെഡും വഴി കുറഞ്ഞനിരക്കിൽ ഭക്ഷ്യധാന്യം വിതരണം ചെയ്യാൻ സംസ്ഥാന സർക്കാരിന്‌ കഴിയുന്നില്ല. പൊതുവിപണിയിൽ ഭക്ഷ്യധാന്യങ്ങളുടെ വൻവിലക്കയറ്റത്തിനും ഇത്‌ കാരണമാകും. 

ഓപ്പൺ മാർക്കറ്റ്‌ സെയിൽസ്‌ സ്‌കീം (  ഒഎംഎസ്‌എസ്‌ ) ടെൻഡറിൽ പങ്കെടുക്കുന്നതിനാണ്‌ കേന്ദ്രം വിലക്ക്‌ ഏർപ്പെടുത്തിയത്‌. അതേസമയം ഭാരത്‌ അരിക്കായി 10,000 ടൺ അരി കേന്ദ്രം കേരളത്തിലെ എഫ്‌സിഐ ഗോഡൗണിൽനിന്നായി അനുവദിച്ചിട്ടുണ്ട്‌. പൊതുതെരഞ്ഞെടുപ്പ്‌ മുന്നിൽ കണ്ടാണ്‌ കേന്ദ്രസർക്കാർ കിലോയ്‌ക്ക്‌ 29 രൂപ എന്ന നിരക്കിൽ ഭാരത്‌ വിതരണം ചെയ്‌തത്‌. കേന്ദ്രസർക്കാർ ഏജൻസി വഴിയാണ്‌ ഇവ വിതരണം ചെയ്യുന്നത്‌. ഇത്‌ വിവേചനമാണ്‌. ഇതിനെതിരെയാണ്‌ കേരളം കോടതിയെ സമീപിക്കുന്നതെന്നും ഭക്ഷ്യമന്ത്രി ജിആർ അനിൽ പറഞ്ഞു.

ഒരുവർഷം 14.25 ലക്ഷം മെട്രിക് ടൺ റേഷൻ ഭക്ഷ്യധാന്യംമാത്രമാണ്‌ കേന്ദ്രം കേരളത്തിന്‌ അനുവദിക്കുന്നത്‌. ഇതിൽ 10.26 ലക്ഷം മെട്രിക് ടൺ ഭക്ഷ്യധാന്യങ്ങളും 43ശതമാനം വരുന്ന മുൻഗണനാ വിഭാഗത്തിനാണ്‌. 57ശതമാനം വരുന്ന മുൻഗണനേതര വിഭാഗത്തിനായി 3.99 ലക്ഷം മെട്രിക് ടൺ ഭക്ഷ്യധാന്യമാണ്  നൽകുന്നത്.  മുൻഗണേനതര കാർഡുകാർ 52.76 ലക്ഷമാണ്‌.