ആകാശ് തില്ലങ്കേരിയെ കാപ്പ ചുമത്തി കസ്റ്റഡിയിലെടുത്തു
കണ്ണൂര്‍ : ഷുഹൈബ് വധക്കേസ് പ്രതി ആകാശ് തില്ലങ്കേരിക്കെതിരെ കാപ്പ ചുമത്തി കസ്റ്റഡിയിലെടുത്തു. വിയ്യൂര്‍ ജയിലില്‍ ജയിലറെ മര്‍ദ്ദിച്ച കേസിലാണ് മുഴക്കുന്ന് പോലീസിന്‍റെ നടപടി. ആകാശിന്‍റെ കുഞ്ഞിന്‍റെ പേരിടല്‍ ചടങ്ങ് നടക്കുന്നതിനിടെയാണ് പോലീസ് കസ്റ്റഡിയിലെടുത്തത്. ആദ്യ കാപ്പ കാലാവധി കഴിഞ്ഞ് ഏഴ് ദിവസം മുന്‍പാണ് ആകാശ് നാട്ടിലെത്തിയത്.
വിയ്യൂര്‍ സെന്‍ട്രല്‍ ജയിലില്‍ വച്ച് ഫോണ്‍ ഉപയോഗിച്ചെന്ന സംശയമുണ്ടായതിനെ തുടര്‍ന്ന് ചോദ്യം ചെയ്യാന്‍ വിളിച്ച ജയിലറെയാണ് ആകാശ് തില്ലങ്കേരി മര്‍ദിക്കുകയായിരുന്നു. മര്‍ദനത്തെ തുടര്‍ന്ന് അസിസ്റ്റന്‍റ് ജയിലര്‍ രാഹുലിനെ തൃശൂര്‍ മെഡിക്കല്‍ കോളജില്‍ പ്രവേശിപ്പിച്ചിരുന്നു. പിന്നാലെയാണ് ആകാശിനെതിരെ പരാതി നല്‍കിയത്. കാപ്പ തടവുകാരനായി ആകാശ് ജയിലില്‍ കഴിയുമ്പോഴാണ് സംഭവം.
ആകാശ് കഴിയുന്ന സെല്ലിന് ഉള്ളിലെ ദൃശ്യങ്ങള്‍ കാണാന്‍ കഴിയാത്ത വിധം തുണിവച്ച് മറച്ചിരുന്നത് രാഹുല്‍ ചോദ്യം ചെയ്തിരുന്നു. ഇതിനു പുറമേ ഫോണ്‍ ഉപയോഗിക്കുന്നുവെന്ന് സംശയം പ്രകടിപ്പിക്കുകയും ചെയ്തതോടെ ആകാശിന് രാഹുലിനോട് വിരോധമുണ്ടാകുകയും ജയിലിലെ ഓഫീസ് മുറിയില്‍ വച്ച് ആക്രമിക്കുകയുമായിരുന്നു.
സംഭവത്തില്‍ ജയില്‍ ഉദ്യോഗസ്ഥര്‍ പരാതി നല്‍കിയതിന് പിന്നാലെ ജാമ്യമില്ലാ വകുപ്പ് ചുമത്തിയാണ് വിയ്യൂര്‍ പൊലീസ് ആകാശിനെതിരെ കേസെടുത്തത്.
