കൊല്ലത്തും കോട്ടയത്തും ഇന്ന് 36 ഡിഗ്രി വരെ ചൂട്, വരണ്ട കാലാവസ്ഥ അടുത്ത രണ്ടാഴ്‌ചയും തുടരുമെന്ന്‌ കേന്ദ്ര കാലാവസ്ഥാ കേന്ദ്രം

തിരുവനന്തപുരം : നിലവിലുള്ള വരണ്ട കാലാവസ്ഥ അടുത്ത രണ്ടാഴ്‌ചയും തുടരുമെന്ന്‌ കേന്ദ്ര കാലാവസ്ഥാ  കേന്ദ്രം പ്രവചനം. ഇത്‌ യാഥാർഥ്യമായാൽ കഴിഞ്ഞ ഒരുനൂറ്റാണ്ടിനിടയിലെ ഏറ്റവും കുറവ് മഴ ലഭിച്ച ആഗസ്‌താകും ഇത്‌ .എട്ടു ജില്ലയിൽ ശനിയാഴ്‌ച താപനില ഉയരുമെന്ന്‌ കാലാവസ്ഥാവകുപ്പ്‌ പ്രവചിക്കുന്നു.

കൊല്ലം, കോട്ടയം ജില്ലകളിൽ സാധാരണയുള്ളതിനേക്കാൾ ചൂട് മൂന്നുമുതൽ അഞ്ചു ഡിഗ്രിവരെ ഉയർന്ന്‌ 36 ഡിഗ്രിവരെയാകാം. തിരുവനന്തപുരം, ആലപ്പുഴ, പാലക്കാട് ജില്ലകളിൽ 34 ഡിഗ്രിവരെയും കണ്ണൂർ, എറണാകുളം, തൃശൂർ ജില്ലകളിൽ 33 ഡിഗ്രിവരെയും ഉയർന്നേക്കും.വെള്ളിയാഴ്‌ച കൊല്ലം, കോട്ടയം ജില്ലകളിൽ  സാധാരണയിൽനിന്ന്‌ അഞ്ച്‌ ഡിഗ്രി വരെ ചൂട്‌ ഉയർന്നു.  ഉയർന്ന താപനില 36 ഡിഗ്രി വരെയായി.  തിരുവനന്തപുരം, ആലപ്പുഴ, പാലക്കാട് ജില്ലകളിൽ ചൂട്‌ നാല്‌ ഡിഗ്രി വരെയും കൂടി 34 ഡിഗ്രിയായി. കണ്ണൂർ, എറണാകുളം, തൃശൂർ ജില്ലകളിൽ 33 ഡിഗ്രിവരെയും ചൂട്‌ ഉയർന്നു. 

 സാധാരണ ലഭിക്കേണ്ട മഴപോലും ലഭിക്കാതെ വരൾച്ചാഭീഷണി നിലനിൽക്കുന്ന സംസ്ഥാനത്ത്‌ ചൂട്‌ ഉയരുന്നത്‌ പ്രശ്‌നമാണ്‌. ഒമ്പത്‌ ജില്ലകളിൽ ഇത്തവണ 63 ശതമാനം മുതൽ 41 ശതമാനം വരെ മഴക്കുറവ് രേഖപ്പെടുത്തി. പ്രധാന അണക്കെട്ടുകളിൽ ജലനിരപ്പ് സംഭരണശേഷിയുടെ പകുതിപോലും ഇപ്പോഴില്ല.