ആക്രമിച്ചവർ വെറും ആയുധങ്ങൾ , തീരുമാനമെടുത്തവർ ഇപ്പോഴും കാണാമറയത്ത് : കൈവെട്ടുകേസ് വിധിയിൽ പ്രതികരിച്ച് പ്രൊഫ.ടിജെ ജോസഫ്

കൊച്ചി : തന്നെ ആക്രമിച്ചവർ വെറും ആയുധങ്ങൾ മാത്രമാണെന്നും തീരുമാനമെടുത്തവർ ഇപ്പോഴും കാണാമറയത്താണെന്നും പ്രൊഫ.ടി.ജെ.ജോസഫ്. മൂവാറ്റുപുഴയിലെ കൈവെട്ടുകേസിൽ ആറുപ്രതികൾ കുറ്റക്കാരെന്ന എൻഐഎ കോടതിവിധിയെക്കുറിച്ച് പ്രതികരിക്കുകയായിരുന്നു സംഭവബത്തിലെ ഇരയായ പ്രൊഫ. ജോസഫ്. പ്രതികൾക്കു കിട്ടുന്ന ശിക്ഷ ഇരയ്ക്കു കിട്ടുന്ന നീതിയല്ലെന്നായിരുന്നും ടിജെ.ജോസഫ്  പറഞ്ഞു. 

ടി.ജെ. ജോസഫിന്റെ വാക്കുകൾ

പ്രതികളെ ശിക്ഷിക്കുന്നത് ഇരയ്ക്കു കിട്ടുന്ന നീതിയാണെന്ന വിശ്വാസമില്ല. രാജ്യത്തിന്റെ നീതി നടപ്പാകുന്നു എന്നു മാത്രം. പ്രതികളെ ശിക്ഷിക്കുന്നതിലോ ശിക്ഷിക്കാതിരിക്കുന്നതിലോ വ്യക്തിപരമായ ഇഷ്ടാനിഷ്ടങ്ങളില്ല. കേസിൽ ഉൾപ്പെട്ട പ്രതികൾ എന്നപ്പോലെ തന്നെ ഇരയാക്കപ്പെട്ടവരാണ്. പ്രാക‍ൃതമായ വിശ്വാസത്തിന്റെ പേരിലാണു എന്നെ ഉപദ്രവിച്ചത്. എല്ലാമനുഷ്യരും ശാസ്ത്രാവബോധം ഉൾക്കൊണ്ടു മാനവികതയിലും സാഹോദര്യത്തിലും പുലർന്ന് ആധുനികപൗരന്മാരായി മാറേണ്ട കാലം അതിക്രമിച്ചു.

എന്നെ ഉപദ്രവിച്ചവർ വെറും ആയുധങ്ങൾ മാത്രമാണ്. മറ്റുള്ള ആളുകളുടെ ആജ്ഞാനുവർത്തികള്‍. ശരിക്കുള്ള പ്രതികൾ കേസിനു പുറത്താണ്. കേസിൽ ശിക്ഷിക്കപ്പെടുന്ന, വിചാരണ ചെയ്യപ്പെടുന്നവരല്ല ശരിക്കുള്ള പ്രതികൾ. എന്നെ ആക്രമിക്കാൻ തീരുമാനമെടുത്തവരാണു ശരിയായ പ്രതികൾ. എന്നാൽ  പിടിക്കപ്പെടുന്നതും ശിക്ഷിക്കപ്പെടുന്നതും ഉപകരണങ്ങളാക്കപ്പെടുന്ന പാവങ്ങളാണ്. പ്രാകൃത വിശ്വാസങ്ങളുടെ പേരിൽ മനുഷ്യത്വരഹിത പ്രവൃത്തികൾ നടത്താൻ ഉദ്ബോധനം കൊടുക്കുന്നവരാണു ശരിക്കും കുറ്റവാളികൾ. അവർ കാണാമറയത്താണ്.

ആദ്യം ജയിലിലടയ്ക്കേണ്ടതു പ്രാകൃത നിയമങ്ങളെയാണു, വിശ്വാസങ്ങളെയാണ്. ആ വിശ്വാസത്തെയാണു ആദ്യം ഉന്മൂലനം ചെയ്യേണ്ടത്. പ്രാകൃത വിശ്വാസങ്ങളുടെ ഇരയായിട്ടാണു കാണാമറയത്തുള്ള മനുഷ്യരും പ്രവർത്തിക്കുന്നത്. ആധുനികമനുഷ്യരാകാൻ അവരെയും ബോധവൽക്കരിക്കണം. രണ്ടായിരം കൊല്ലങ്ങൾക്കു മുമ്പുള്ള ചില വിശ്വാസ സംഹിതകളാണു വില്ലനായിട്ട് നിൽക്കുന്നത്.  പ്രാകൃതമായ ഗോത്ര വര്‍ഗ വിശ്വാസമാണ് തനിക്ക് നേരെ ഇത്തരത്തിലുള്ള ഒരു ആക്രണമുണ്ടാകാന്‍ കാരണം. ഉന്‍മൂലനം ചെയ്യേണ്ടത് അത്തരം വിശ്വാസങ്ങളെയാണ്. എന്നാല്‍ തന്നെ ആക്രമിച്ച കേസിലെ പ്രതികളും ആ വിശ്വാസത്തിന്റെ ഇരകളാണ് എന്നതാണ് സത്യം.