സ്കൂൾ വിദ്യാർഥിനിക്കു നേരെ നഗ്നതാ പ്രദർശനം; യുവാവ് അറസ്റ്റിൽ

സ്കൂൾ വിദ്യാർഥിനിക്കു നേരെ നഗ്നതാ പ്രദർശനം നടത്തിയയാൾ അറസ്റ്റിൽ. കൊടുങ്ങല്ലൂർ വെമ്പല്ലൂർ കൈതക്കാട്ട് വീട്ടിൽ പ്രതീഷിനെ (42) ആണ് വടക്കേക്കര പൊലീസ് അറസ്റ്റ് ചെയ്തത്. ഇയാൾ സഞ്ചരിച്ച കാറും കസ്റ്റഡിയിലെടുത്തു. കഴിഞ്ഞ ദിവസം വൈകിട്ട് 3.30നാണ് സംഭവം.

വിദ്യാർഥിനി സ്കൂളിൽ നിന്നു വീട്ടിലേക്കു തനിയെ നടന്നു പോകുന്നതു കണ്ട പ്രതി, കാറിൽ പിന്നാലെ ചെല്ലുകയായിരുന്നു. വഴി ചോദിക്കാൻ എന്ന വ്യാജേന വിദ്യാർഥിനിയുടെ അടുത്തു കാർ നിർത്തി അടുത്തേയ്ക്കു വിളിച്ചശേഷം നഗ്നത പ്രദർശിപ്പിച്ചെന്നാണ് പരാതി. ഭയന്ന വിദ്യാർഥിനി നിലവിളിച്ച്, ഓടിപ്പോയി വീട്ടിലെത്തി വിവരം അറിയിച്ചു.

വടക്കേക്കര ഇൻസ്പെക്ടർ വി.സി.സൂരജിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. പ്രതി സഞ്ചരിച്ച കാറിനെ കേന്ദ്രീകരിച്ചായിരുന്നു അന്വേഷണം. പ്രതിയെ അറസ്റ്റു ചെയ്തു കോടതിയിൽ ഹാജരാക്കി റിമാൻഡ് ചെയ്തു. പ്രവാസിയായിരുന്ന ഇയാള്‍, ഇപ്പോൾ നാട്ടിൽ സ്ഥിര താമസക്കാരനാണ്.