വിവാഹ വാഗ്ദാനം നൽകി പീഡിപ്പിച്ചു; സെലിബ്രിറ്റി ഫോട്ടോഗ്രാഫർ അറസ്റ്റിൽ
സെലിബ്രിറ്റി ഫോട്ടോഗ്രാഫറും ഗുരുവായൂര്‍ ദേവസ്വം ബോര്‍ഡ് ജീവനക്കാരനുമായ യുവാവ് പീഡനക്കേസില്‍ അറസ്റ്റില്‍. വിവാഹ വാഗ്ദാനം നല്‍കി പീഡിപ്പിച്ചു എന്ന യുവതിയുടെ പരാതിയിലാണ് അറസ്റ്റ്. കുന്നംകുളം ആനായിക്കല്‍ പ്രണവ് സുഭാഷിനെയാണ് കടവന്ത്ര പോലീസ് അറസ്റ്റ് ചെയ്തത്.
ഒരു സാമൂഹിക മാധ്യമത്തിലൂടെയാണ് മലപ്പുറം സ്വദേശിയായ യുവതി ഇയാളെ പരിചയപ്പെട്ടത്. തുടര്‍ന്ന് ഇരുവരും തമ്മില്‍ പ്രണയത്തിലാവുകയുമായിരുന്നു. വിവാഹ വാഗ്ദാനം നല്‍കി പീഡിപ്പിക്കുകയും തുടര്‍ന്ന് യുവതി ഗര്‍ഭിണിയാണെന്ന് അറിഞ്ഞപ്പോള്‍ ഗര്‍ഭം അലസിപ്പിക്കാന്‍ നിര്‍ബന്ധിക്കുകയും ചെയ്തു.
എന്നാല്‍ വിവാഹം ചെയ്യണമെന്ന് യുവതി നിര്‍ബന്ധിച്ചതോടെ വിവാഹത്തില്‍ നിന്ന് പിന്മാറുകയും ഗര്‍ഭം ഒഴിവാക്കിയില്ലെങ്കില്‍ യുവതിയുമായുള്ള സ്വകാര്യ നിമിഷങ്ങള്‍ പ്രചരിപ്പിക്കുമെന്ന് ഭീഷണിപ്പെടുത്തിയതായും പരാതിയില്‍ പറയുന്നു. മലപ്പുറം സ്വദേശിയായ യുവതി കൊച്ചിയില്‍ ജോലിചെയ്യുകയാണ്.
യുവതിയുടെ പരാതിയെ തുടര്‍ന്ന് കഴിഞ്ഞ ദിവസം പോലീസ് അറസ്റ്റ് ചെയ്ത ഇയാളെ കോടതി കസ്റ്റഡിയില്‍ വിടുകയായിരുന്നു.
