ബിജെപി ദേശീയ വക്താവ് ഷെഹ്സാദ് പൂനെവാല പാര്‍ട്ടിയില്‍നിന്ന് രാജിവച്ചു

ന്യൂഡല്‍ഹി : ബിജെപി ദേശീയ വക്താവ് ഷെഹ്സാദ് പൂനെവാല പാര്‍ട്ടിയില്‍നിന്ന് രാജിവച്ചു. ബിജെപിയുടെ ഉന്നത നേതൃത്വത്തിന് അദ്ദേഹം രാജി സമര്‍പ്പിച്ചതായും വ്യക്തിപരമായ കാരണങ്ങളാണു തീരുമാനത്തിനു പിന്നിലെന്നുമാണു റിപ്പോര്‍ട്ടുകള്‍. ഷെഹ്സാദ് പൂനെവാല തന്റെ എക്‌സ് ഹാന്‍ഡിലില്‍ നിന്ന് ബിജെപി ദേശീയ വക്താവ് എന്നത് ഒഴിവാക്കുകയും നരേന്ദ്ര മോദിയുടെ ആജീവനാന്ത അനുയായി എന്ന് നിലനിര്‍ത്തുകയും ചെയ്തു

കഴിഞ്ഞ ദിവസവും വിവിധ വിഷയങ്ങളില്‍ ബിജെപിക്കു വേണ്ടി അദ്ദേഹം പ്രതികരണം നടത്തിയിരുന്നു. ടെലിവിഷന്‍ ചാനലുകളില്‍ ബിജെപിയുടെ മുഖമായിരുന്നു ഷെഹ്‌സാദ് പൂനെവാല. രാജി സംബന്ധിച്ചു പാര്‍ട്ടിയില്‍നിന്നോ പൂനെവാലയില്‍നിന്നോ ഇതുവരെ ഔദ്യോഗിക പ്രസ്താവനകളൊന്നും പുറത്തുവന്നിട്ടില്ല.

2017ല്‍ കോണ്‍ഗ്രസ് അധ്യക്ഷ തെരഞ്ഞെടുപ്പ് പ്രക്രിയയുമായി ബന്ധപ്പെട്ട തര്‍ക്കങ്ങളെത്തുടര്‍ന്നാണ് അഭിഭാഷകനായ ഷെഹ്സാദ് പൂനെവാല കോണ്‍ഗ്രസ് വിട്ടത്. പിന്നീട് ബിജെപിയില്‍ ചേര്‍ന്ന അദ്ദേഹത്തെ പാര്‍ട്ടിയുടെ ദേശീയ വക്താവായി നിയമിക്കുകയായിരുന്നു.