എല്‍ഡിഎഫ് കൊണ്ടുവന്ന അവിശ്വാസപ്രമേയം പാസ്സായി; പാലാ നഗരസഭയില്‍ യുഡിഎഫിന് ഭരണം നഷ്ടമായി

പാലാ : എല്‍ഡിഎഫ് കൊണ്ടുവന്ന അവിശ്വാസപ്രമേയം പാസ്സായതിനെ തുടര്‍ന്ന് പാലാ നഗരസഭയില്‍ യുഡിഎഫിന് ഭരണം നഷ്ടമായി. പ്രതിപക്ഷത്തിനൊപ്പം കോണ്‍ഗ്രസിന്റെ നാല് അംഗങ്ങള്‍ കൂടി എതിരേ വോട്ടുചെയ്ത സാഹചര്യത്തിലാണ് യുഡിഎഫിന് ഭരണം പോയത്. 17 പേര്‍ എതിര്‍ത്ത് വോട്ടുചെയ്യുകയായിരുന്നു. വിപ്പ് ലംഘിച്ചാണ് നാലു കോണ്‍ഗ്രസ് ഭരണസമിതിക്കെതിരേ വോട്ടുചെയ്തു.

ഇതോടെ ബിനുപുളിക്കല്‍ കുടുംബത്തിന്റെ ആധിപത്യത്തിനാണ് തിരിച്ചടിയായിരിക്കുന്നത്. ഒരംഗത്തിന്റെ ഭൂരിപക്ഷത്തിലായിരുന്നു പാലായില്‍ യുഡിഎഫ് ഭരണം നടത്തിയിരുന്നത്. ആകെ 26 സീറ്റില്‍ 14 ആയിരുന്നു കേവലഭൂരിപക്ഷം. കേരളാകോണ്‍ഗ്രസ് എമ്മിന്റെ കൗണ്‍സിലര്‍മാരും കോണ്‍ഗ്രസും എല്‍ഡിഎഫിന് പിന്തുണ നല്‍കുമോ എന്നാണ് ഇനി അറിയാനുള്ളത്. കേരളാകോണ്‍ഗ്രസിന്റെ തട്ടകത്തില്‍ യുഡിഎഫ് ഭരണം പിടിച്ചെടുത്തായിരുന്നു നേരത്തേ പാലാനഗരസഭയില്‍ മുമ്പോട്ട് പോയത്. എന്നാല്‍ ആറു മാസം കഴിഞ്ഞപ്പോള്‍ തന്നെ ഭരണം നഷ്ടമായ സ്ഥിതിയാണ്. ദിയാ പുളിക്കണ്ടത്തിന് പകരം നഗരസഭാ അദ്ധ്യക്ഷ സ്ഥാനത്തേക്ക് വിമതയായി ജയിച്ച സ്വതന്ത്ര കൗണ്‍സിലര്‍ മായാരാഹുലിനാണ് കൂടുതല്‍ സാധ്യത കല്‍പ്പിക്കപ്പെടുന്നത്. വിമത കോണ്‍ഗ്രസുകാര്‍ അടക്കം മായയെ പിന്തുണയ്ക്കുമെന്നാണ് കരുതുന്നത്.

കോണ്‍ഗ്രസ് അവിശ്വാസത്തിനെതിരേ തങ്ങളുടെ ആറ് കൗണ്‍സിലര്‍മാര്‍ക്ക് വിപ്പ് നല്‍കിയിരുന്നു. എന്നാല്‍ രണ്ടുപേര്‍ വിട്ടു നിന്നപ്പോള്‍ നാലുപേര്‍ വിപ്പ് സ്വീകരിക്കാതെ എതിര്‍ത്ത് വോട്ടുചെയ്യുക. മായാരാഹുല്‍ ചെയര്‍പേഴ്‌സണായി എത്തുമെന്നാണ് കരുതുന്നത്. നിലവില്‍ പാലായില്‍ കേരളാകോണ്‍ഗ്രസ് മാണി വിഭാഗത്തിന് 10 സീറ്റുകളും സിപിഐഎമ്മിന് രണ്ടും സീറ്റുകളാണ് ഉള്ളത്. ഇവര്‍ക്കൊപ്പം കോണ്‍ഗ്രസിന്റെ നാലുപേര്‍കൂടി ചേരുമ്പോള്‍ എല്‍ഡിഎഫിന് കീഴിലുള്ള ഭരണമാറ്റം വന്നേക്കാനാണ് സാധ്യത. തങ്ങളുടെ മണ്ഡലം കമ്മറ്റി അദ്ധ്യക്ഷനെ വരെ ആക്ഷേപിച്ചതിനുള്ള മറുപടിയായിട്ടാണ് യുഡിഎഫിനെതിരേ വോട്ട് ചെയ്തതെന്നാണ് കോണ്‍ഗ്രസ് കൗണ്‍സിലര്‍മാര്‍ പറഞ്ഞത്.