കോൺഗ്രസിലെ മുഖ്യമന്ത്രി ചർച്ച : വിഡി സതീശൻ അനുകൂലികള്‍ തെരുവിലേക്ക്; വിവിധ ഇടങ്ങളിൽ പ്രകടനത്തിന് ആഹ്വാനം

തിരുവനന്തപുരം : കോൺഗ്രസിലെ മുഖ്യമന്ത്രി ചർച്ചകൾക്കിടെ വി.ഡി സതീശൻ അനുകൂലികള്‍ തെരുവിലേക്ക്. സതീശനെ മുഖ്യമന്ത്രിയാക്കണമെന്നാണ് പ്രവര്‍ത്തകരുടെ ആവശ്യം. കൊടുങ്ങല്ലൂരില്‍ വൈകീട്ട് പ്രകടനം നടക്കും. കുന്നംകുളം കടവല്ലൂരിലും ആലുവയിലും പ്രകടനത്തിന് ആഹ്വാനം.

തിരുവനന്തപുരത്തെ സ്വകാര്യഹോട്ടലിലുള്ള എഐസിസി നിരീക്ഷകരെ കാണാൻ നേതാക്കളുടെ നീണ്ട നിരയെത്തി. വി.ഡി.സതീശൻ, കെ.സുധാകരൻ, കൊടിക്കുന്നിൽ സുരേഷ്, വി.എം സുധീരൻ,പി.ജെ കുര്യൻ തുടങ്ങിയവരാണ് എത്തിയത്. കെപിസിസി ആസ്ഥാനത്തെ യോഗത്തിന് മുമ്പാണ് നേതാക്കൾ നിരീക്ഷകരെ കാണാനെത്തിയത്. എംഎൽഎമാരുടെ പിന്തുണ പ്രധാനമാണെന്നും അവരാണ് പാര്‍ട്ടിയുടെ അസ്ഥിത്വമെന്നും കെ.സുധാകരൻ പറഞ്ഞു. പാർട്ടിയിൽ ഒരു സതീശൻ മാത്രമല്ല, ഒരുപാട് സതീശൻമാരുണ്ട്. കേരള രാഷ്ട്രീയത്തെക്കുറിച്ച് അവരോട് പറഞ്ഞു ബോധ്യപ്പെടുത്തി. ഒരു പ്രത്യേക പേര് പറഞ്ഞില്ല. പകരം ഒരു ഫോർമുല മുന്നോട്ടു വച്ചു. ഇന്‍റര്‍നാഷണൽ കോൺഗ്രസിൽ ഒരുപാട് നേതാക്കളുണ്ടെന്നും അദ്ദേഹം പറഞ്ഞു.കെ.സി വേണുഗോപാലിനെ മുഖ്യമന്ത്രിയാക്കാൻ കെ.സുധാകരൻ എഐസിസി നിരീക്ഷകർക്ക് കത്ത് നൽകി. മുഖ്യമന്ത്രിയുടെ കാര്യത്തിൽ അഭിപ്രായം അകത്തു പറഞ്ഞിട്ടുണ്ടെന്ന് ചാണ്ടി ഉമ്മൻ പറഞ്ഞു.

മുഖ്യമന്ത്രി ചര്‍ച്ചയിൽ സിഎംപിക്ക് പ്രഖ്യാപിത നിലപാടുണ്ടെന്ന് സി.പി ജോൺ പറഞ്ഞു. ഹൈക്കമാൻഡിന് ആളെ കണ്ടെത്താൻ കഴിവുണ്ട്. അവർ എടുക്കുന്ന തീരുമാനം സിഎംപി അംഗീകരിക്കുമെന്നും അദ്ദേഹം കൂട്ടിച്ചേര്‍ത്തു. തങ്ങൾക്ക് കോൺഗ്രസിനോടാണ് താൽപര്യമെന്നും ഹൈക്കമാൻഡ് ആരുടെ പേര് പറഞ്ഞാലും പിന്തുണക്കുമെന്നും ജോൺ പറഞ്ഞു.

വൈകിട്ട് യുഡിഎഫ് ഘടകകക്ഷി നേതാക്കളുമായും നിരീക്ഷകർ കൂടിക്കഴ്ച നടത്തും. അതിനിടെ കെപിസിസി ആസ്ഥാനത്തിന് മുമ്പിൽ കെ.സി വേണുഗോപാലിനായി ഫ്ലക്സ് ബോർഡുകൾ ഉയർന്നു.

അതേസമയം മുഖ്യമന്ത്രി ചര്‍ച്ചയിൽ മുസ്‍ലിം ലീഗിനെതിരെ മാത്യു കുഴൽനാടൻ രംഗത്തെത്തി. ലീഗിന്‍റെ ആഭ്യന്തര കാര്യങ്ങളിൽ കോൺഗ്രസ് ഇടപെടാറില്ല. അങ്ങനെയാകണം തിരിച്ചും. പരസ്പര ധാരണയോടുകൂടി വേണം മുന്നോട്ട് പോകാനെന്നും അദ്ദേഹം പറഞ്ഞു.