പ്രണയബന്ധം എതിര്‍ത്ത പിതൃസഹോദരനെ കാറിടിച്ച് കൊല്ലാന്‍ ശ്രമം; എറണാകുളത്ത് യുവാവ് അറസ്റ്റില്‍

കൊച്ചി : എറണാകുളം അയ്യപ്പന്‍കാവില്‍ പിതൃസഹോദരനെ കാറിടിച്ച് കൊല്ലാന്‍ ശ്രമിച്ച യുവാവ് അറസ്റ്റില്‍. അയ്യപ്പന്‍കാവ് സ്വദേശി അഭിജിത് പ്രസാദ് ആണ് അറസ്റ്റിലായത്. പ്രണയബന്ധം എതിര്‍ത്തതിന്‍റെ പേരിലാണ് പിതൃസഹോദരനെ കൊല്ലാന്‍ ശ്രമിച്ചത്.

വിവാഹമോചിതയായ യുവതിയുമായിി അഭിജിത്തിനുണ്ടായിരുന്ന പ്രണയബന്ധത്തെ വീട്ടുകാർ എതിർത്തിരുന്നു. ഇതുമായി ബന്ധപ്പെട്ട് തര്‍ക്കവും പൊലീസില്‍ പരാതിയും നല്‍കിയിരുന്നു. കേസെടുക്കാന്‍ പിതൃസഹോദരനായ സത്യപാലന്‍ നിര്‍ബന്ധിച്ചതാണ് വിരോധത്തിന് കാരണം.

സത്യപാലൻ തന്റെ വ്യാപാര സ്ഥാപനത്തിൽ നിന്ന് സ്കൂട്ടറിൽ പുറത്തേക്ക് വരുന്ന സമയം നോക്കി കാറിൽ കാത്തുനിന്ന അഭിജിത്ത്, പിന്നിൽ നിന്ന് സ്കൂട്ടറിനെ ഇടിച്ചുതെറിപ്പിക്കുകയായിരുന്നു. അപകടത്തിന് ശേഷം സത്യപാലനെ ആശുപത്രിയിലെത്തിക്കാനും അഭിജിത്ത് മുന്നിലുണ്ടായിരുന്നു. എന്നാൽ ബന്ധുക്കൾക്ക് സംശയം തോന്നിയതിനെ തുടർന്ന് സിസിടിവി ദൃശ്യങ്ങൾ പരിശോധിച്ചപ്പോഴാണ് അഭിജിത്ത് കാറിടിച്ച് വീഴ്ത്തുന്നത് വ്യക്തമായത്. സിസിടിവി ദൃശ്യങ്ങളുടെ അടിസ്ഥാനത്തിൽ നോർത്ത് പൊലീസ് അഭിജിത്തിനെ അറസ്റ്റ് ചെയ്തു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.