‘യുഡിഎഫ് ജയിക്കും വിഡി സതീശൻ നയിക്കും’; വിഡി സതീശനായി ആലുവയിൽ ഫ്ലക്സ്

കൊച്ചി : കോൺഗ്രസിലെ മുഖ്യമന്ത്രി ചർച്ച വിവാദങ്ങൾക്കിടെ വി ഡി സതീശനായി എറണാകുളത്ത് ഫ്ലക്സ് ബോർഡ് ഉയർന്നു. ‘യുഡിഎഫ് ജയിക്കും വി ഡി സതീശൻ നയിക്കും’ എന്ന ഫ്ലക്സാണ് ആലുവയിലെ പ്രധാനപാതയിൽ ഉയർന്നത്. തിരഞ്ഞെടുപ്പ് ഫലം വരുന്നതിന് മുന്നേ കോൺഗ്രസിൽ മുഖ്യമന്ത്രി തർക്കം തുടരുന്നതിനിടെയാണ് ആലുവ തോട്ടുമുഖത്ത് ഫ്ലക്സ് ഉയർന്നത്.

വിക്കിപീഡിയയിൽ കെസി വേണുഗോപാലിന്റെ പേജിൽ ഇന്നലെ മുഖ്യമന്ത്രിയെന്ന് മാറ്റം വരുത്തിയത് ചർച്ചയായിരുന്നു. അതിനുപിന്നാലെയാണ് ഇതും. വോട്ടെടുപ്പ് കഴിഞ്ഞപ്പോൾ മുതൽ സംസ്ഥാന കോൺഗ്രസിൽ നടക്കുന്ന മുഖ്യമന്ത്രിചർച്ചയെ മുന്നോട്ട് കൊണ്ടുപോകുന്നത് സമൂഹമാധ്യമ ഇടപെടലുകളാണ്. തദ്ദേശ തിരഞ്ഞെടുപ്പ് കാലത്ത് ചിത്രീകരിച്ച ജനനായകൻ എന്ന പേരിലുളള ഡോക്യൂമെന്ററിയും കേരളത്തകുറിച്ചുളള കാഴ്ചപ്പാട് വിശദമാക്കുന്ന പോഡ് കാസ്റ്റുകളുമായാണ് രമേശ് ചെന്നിത്തലക്ക് വേണ്ടിയുളള സമൂഹ മാധ്യമ ഇടപെടൽ.അതേസമയം, മുഖ്യമന്ത്രി സ്ഥാനം സംബന്ധിച്ച ചർച്ചകളോട് പ്രതികരിച്ച കെ.സി.വേണുഗോപാൽ അത്തരം ചർച്ചകളോടുളള വ്യക്തിപരമായ വിയോജിപ്പ് അറിയിക്കുകയുണ്ടായി.