ഡിജിറ്റല് അറസ്റ്റിലൂടെ 10.5 ലക്ഷം തട്ടി; പ്രതിയെ പഞ്ചാബില് നിന്നും അതിസാഹസികമായി പിടികൂടി പൊലീസ്
എന്എസ്എസ് – എസ്എന്ഡിപി ഐക്യം വിഡി സതീശനെതിരെന്ന് വ്യാഖ്യാനിക്കപ്പെട്ടു : ജി സുകുമാരന് നായര്
January 19, 2026
സര്ക്കാരിന്റെ വര്ക്ക് നിയര് ഹോം പദ്ധതിക്ക് ഇന്ന് സംസ്ഥാനത്ത് തുടക്കം
January 19, 2026
കണ്ണൂര് : വനിതാ ഡോക്ടറെ ‘ഡിജിറ്റല് അറസ്റ്റ്’ ഭീഷണി മുഴക്കി 10.5 ലക്ഷം രൂപ തട്ടിയെടുത്ത കേസിലെ മുഖ്യപ്രതി പിടിയില്. പഞ്ചാബ് ലുധിയാന സ്വദേശിയായ ജീവന് രാം (28) ആണ് കണ്ണൂര് സിറ്റി സൈബര് പൊലീസിന്റെ പിടിയിലായത്. പഞ്ചാബിലെ ലുധിയാന ജില്ലയിലെ ഒരു ഉള്ഗ്രാമത്തില് വെച്ച് അതിസാഹസികമായാണ് അന്വേഷണസംഘം പ്രതിയെ പിടികൂടിയത്.
കഴിഞ്ഞ നവംബര് 30-നാണ് കേസിനാസ്പദമായ സംഭവം നടന്നത്. മുംബൈ സിബിഐ ഉദ്യോഗസ്ഥര് എന്ന വ്യാജേന തലശ്ശേരി സ്വദേശിയായ ഡോക്ടറെ വാട്സാപ്പ് വിഡിയോ കോളിലൂടെ ബന്ധപ്പെട്ട തട്ടിപ്പുസംഘം, പരാതിക്കാരിയുടെ പേരില് കള്ളപ്പണം വെളുപ്പിക്കല് കേസുണ്ടെന്ന് പറഞ്ഞ് ഭീഷണിപ്പെടുത്തുകയായിരുന്നു. കേസ് ഒത്തുതീര്പ്പാക്കാനെന്ന പേരില് ഡോക്ടറുടെ വിവിധ അക്കൗണ്ടുകളില് നിന്ന് 10,50,000 രൂപ അയപ്പിക്കുകയായിരുന്നു. തട്ടിപ്പിലൂടെ ലഭിച്ച പണം പ്രതി ജീവന് രാം ചെക്ക് വഴി അക്കൗണ്ടില് നിന്നും പിന്വലിച്ചതായി പൊലീസ് കണ്ടെത്തി.
കണ്ണൂര് സിറ്റി പൊലീസ് കമ്മീഷണര് നിധിന്രാജ് പി ഐപിഎസിന്റെ പ്രത്യേക നിര്ദ്ദേശപ്രകാരം കണ്ണൂര് സിറ്റി സൈബര് പൊലീസ് സ്റ്റേഷന് എസ്.ഐ പ്രജീഷ് ടി.പിയുടെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. എസ്.ഐ ജ്യോതി ഇ, സി.പി.ഒ സുനില് കെ എന്നിവരും സംഘത്തിലുണ്ടായിരുന്നു. പ്രതിയുടെ ലൊക്കേഷന് തുടര്ച്ചയായി മാറിക്കൊണ്ടിരുന്നത് അന്വേഷണത്തെ ബാധിച്ചെങ്കിലും, പഞ്ചാബിലെ കൊടും തണുപ്പും പ്രതികൂല സാഹചര്യങ്ങളും വകവെക്കാതെ അഞ്ചുദിവസത്തോളം പിന്തുടര്ന്നാണ് പൊലീസ് പ്രതിയെ വലയിലാക്കിയത്.
