നിർമാണ പ്രവർത്തനങ്ങൾ പാതിവഴിയിൽ; കലൂർ സ്റ്റേഡിയം ഇന്ന് ജിസിഡിഎക്ക് കൈമാറും

കൊച്ചി : കരാർ കാലാവധി അവസാനിച്ചിട്ടും കലൂർ അന്താരാഷ്ട്ര സ്റ്റേഡിയത്തിലെ നിർമാണ പ്രവർത്തനങ്ങൾ പൂർത്തിയായില്ല. അർജന്റീന ടീമിന്റെ മത്സരത്തിനായി കൈമാറിയ സ്റ്റേഡിയത്തിലെ നിർമാണ പ്രവർത്തനങ്ങൾ പാതിവഴിയിലാക്കി സ്റ്റേഡിയം ഇന്ന് ജിസിഡിഎക്ക് കൈമാറും. നിർമാണ പ്രവർത്തനങ്ങൾക്കായി സെപ്റ്റംബർ 26നാണ് സ്‌പോൺസർ സ്‌റ്റേഡിയം ഏറ്റെടുത്തത്. നംവബർ 30ന് ഉള്ളിൽ നിർമാണ പ്രവർത്തനങ്ങൾ പൂർത്തിയാക്കുമെന്നായിരുന്നു സ്‌പോൺസർ പറഞ്ഞിരുന്നത്.

70 കോടി രൂപയുടെ നവീകരണ പ്രവർത്തനങ്ങളായിരുന്നു സ്‌പോൺസർ പ്രഖ്യാപിച്ചിരുന്നത്. പുതിയ കവാടം, ചുറ്റുമതിൽ, വിവിഐപി സിറ്റിങ് ഏരിയ, സീറ്റിങ് അറേഞ്ച്‌മെന്റ് സംവിധാനം, ടർഫടക്കം നവീകരിക്കുമെന്നായിരുന്നു സ്‌പോൺസർ നൽകിയിരുന്ന വാഗ്ദാനം. വ്യക്തമായ കരാർ ഇല്ലാതെയായിരുന്നു സ്റ്റേഡിയം ജിസിഡിഎ സ്പോൺസർക്ക് കൈമാറിയത്. അർജന്റീന കേരളത്തിലേക്കെത്തുന്നു എന്ന പ്രഖ്യാപനത്തിന് പിന്നാലെയായിരുന്നു സ്റ്റേഡ‍ിയം കൈമാറിയത്. എന്നാൽ അർജന്റീന ടീം കേരളത്തിലേക്ക് എത്തില്ലെന്ന് ഒക്ടോബറിൽ വ്യക്തമായിരുന്നു.

സ്റ്റേഡിയം നവീകരണം പൂർത്തിയാക്കി മാത്രമേ തിരികെ ഏൽ‌പ്പിക്കൂ എന്ന് ജിസിഡിഎയും സ്പോൺസറും വ്യക്തമാക്കിയിരുന്നത്. എന്നാൽ നിർമാണം പാതിവഴിയിലാണ്. സ്റ്റേഡിയത്തിന്റെ പ്രവേശന കവാടം ഉൾപ്പെടെയുള്ളവയുടെ നിർമാണം ഇനിയും പൂർത്തിയായിട്ടില്ല. സീറ്റിങ് സംവിധാനം 70 ശതമാനം മാത്രമാണ് പൂർത്തിയായിരിക്കുന്നത്. സ്റ്റേഡിയം തിരികെ കൈമാറുന്നതോടെ ഇനിയുള്ള നിർമാണം എങ്ങനെയായിരിക്കുമെന്നതിൽ വ്യക്തത വേണം. ജിസിഡിഎ എഞ്ചിനീയറിങ് വിഭാ​ഗം പരിശോധന നടത്തിയ ശേഷമാകും മറ്റ് കാര്യങ്ങൾ തീരുമാനിക്കുകയുള്ളൂ. നിലവിലുള്ള നിർമാണ പ്രവർത്തനങ്ങൾ‌ പൂർ‌ത്തിയാക്കാൻ കുറച്ച് സമയം കൂടെ സ്പോൺസർക്ക് അനുവദിക്കുമെന്നാണ് നിലവിലെ വിവരം.