പാക് അധിനിവേശ കശ്മീർ ഇന്ത്യയുടെ അത് ഭാഗം തിരിച്ച് പിടിക്കണം : മോഹന്‍ ഭാഗവത്

ന്യൂഡൽഹി : പാക് അധിനിവേശ കശ്മീർ ഇന്ത്യയുടെ ഭാഗമാണെന്നും തിരികെ ഇന്ത്യയിലേക്ക് ചേർക്കേണ്ടതുണ്ടെന്നും ആർഎസ്എസ് മേധാവി മോഹൻ ഭാഗവത്. ഇന്ത്യയെ ഒരു വീടായി കരുതുകയാണെങ്കിൽ പാക് അധിനിവേശ കശ്മീർ ആ വീട്ടിലെ ഒരു മുറിയാണെന്നും അവിടെ ചില അപരിചിതർ കയറിയിരിക്കുന്നുവെന്നും മോഹന്‍ ഭാഗവത് പറഞ്ഞു.

ആ മുറി തിരികെ എടുക്കേണ്ടതുണ്ടെന്നും അദ്ദേഹം അഭിപ്രായപ്പെട്ടു. മധ്യപ്രദേശിലെ സത്‌നയിൽ നടന്ന ഒരു പരിപാടിയിൽ സംസാരിക്കുകയായിരുന്നു മോഹന്‍ ഭാഗവത്.

‘ഇവിടെ ഒ‍ട്ടേറെ സിന്ധി സഹോദരന്മാർ ഇരിക്കുന്നുണ്ട്. എനിക്ക് വളരെ സന്തോഷമുണ്ട്. അവർ പാകിസ്താനിലേക്കല്ല പോയത്, അവർ അവിഭക്ത ഇന്ത്യയിലേക്കാണ് പോയത്. സാഹചര്യങ്ങൾ ഞങ്ങളെ ആ വീട്ടിൽ നിന്ന് ഇവിടേക്ക് അയച്ചു, കാരണം ആ വീടും ഈ വീടും വ്യത്യസ്തമല്ല. സാഹചര്യങ്ങളാണ് നമ്മളെ ഇന്നത്തെ ഇന്ത്യയിലേക്ക് എത്തിച്ചത്. ഇന്ത്യ ഒരു വീടാണ്. എന്നാൽ ആരോ നമ്മുടെ വീട്ടിലെ ഒരു മുറി എടുത്തുമാറ്റിയിരിക്കുന്നു. അവിടെ എൻ്റെ മേശയും കസേരയും വസ്ത്രങ്ങളും എല്ലാം സൂക്ഷിച്ചിരുന്നതാണ്. അവർ അത് കയ്യേറിയിരിക്കുകയാണ്. വൈകാതെ എനിക്കത് തിരിച്ചെടുക്കണം’- മോഹന്‍ ഭാഗവത് പറഞ്ഞു.

പാക് അധിനിവേശ കശ്മീരിൽ ആഭ്യന്തര സംഘർഷം നിലനിൽക്കുന്നതിനിടെയായിരുന്നു ആർഎസ്എസ് മേധാവിയുടെ പരാമർശം. കഴിഞ്ഞ മൂന്നു ദിവസത്തിനിടെ പാക് സൈന്യം പ്രതിഷേധക്കാരുമായി ഏറ്റുമുട്ടിയതിനെ തുടർന്ന് 10 പേർ കൊല്ലപ്പെടുകയും നൂറിലധികം പേർക്ക് പരിക്കേൽക്കുകയും ചെയ്തിരുന്നു.