പെന്റ​ഗണിൻറെ പേര് മാറ്റാൻ ഒരുങ്ങി ട്രംപ്

വാഷിംഗ്‌ടൺ ഡിസി : അമേരിക്കയുടെ പ്രതിരോധ വിഭാ​ഗത്തിന്റെ ആസ്ഥാനമായ പെന്റ​ഗണിന്റെ പേര് മാറ്റാൻ ഒരുങ്ങി യുഎസ് പ്രസിഡ‌ന്റ് ഡോണൾഡ് ട്രംപ്. പെന്റ​ഗൺ എന്ന പേര് മാറ്റി ‍ഡിപ്പാർട്മെന്റ് ഓഫ് വാർ അഥവാ യുദ്ധവിഭാ​ഗം എന്ന പേരിന് അനുമതി നൽകാനൊരുങ്ങുകയാണ് ട്രംപ്. പേര് മാറ്റം യുഎസ് കോൺ​ഗ്രസ് ചേരാതെ, ട്രംപ് തന്റെ ഔദ്യോ​ഗിക തീരുമാനത്തിലൂടെയാണ് നടപ്പിൽ വരുത്തുന്നത്.

യുദ്ധ വിഭാ​ഗം എന്ന പുതിയ പേര് രണ്ടാമത്തെ തലവാചകമായിരിക്കും എന്നാണ് ട്രംപ് ഭരണകൂടം അറിയിച്ചത്. എന്നാൽ അമേരിക്കയുടെ മറ്റ് ഔദ്യോ​ഗിക വിഭാ​ഗങ്ങൾ പെന്റഗണിനെ യുദ്ധവിഭാ​ഗം എന്നായിരിക്കും അഭിസംബോധന ചെയ്യുക. പ്രതിരോധ സെക്രട്ടറിയായ പീറ്റ് ഹെ​ഗ്സെത്ത് സെക്രട്ടറി ഓഫ് വാർ എന്നായിരിക്കും അറിയപ്പെടുകയെന്നും ഭരണകൂടം കൂട്ടിചേർത്തു.

ഡോണൾഡ് ട്രംപും പീറ്റ് ഹെ​ഗ്സെത്തും കഴിഞ്ഞ ഏതാനും ആഴ്ചകളായി പെന്റ​ഗണിന്റെ പേര് മാറ്റാൻ പരസ്യമായി തന്നെ ശ്രമിച്ചിരുന്നു. എന്നാൽ ഔദ്യോ​ഗിക അറിയിപ്പിലൂടെയുള്ള ഈ താൽക്കാലിക പേര് മാറ്റത്തിന് പകരം സ്ഥിരമായി യുദ്ധ വിഭാ​ഗം എന്ന പേര് സ്വീകരക്കാൻ ആവശ്യമായ നിയമനടപടികൾ സ്വീകരിക്കാൻ ഹെ​ഗ്സെത്തിനോട് ആവശ്യപ്പെട്ടിരിക്കുകയാണ് ട്രംപ്.

‘യുദ്ധവിഭാ​​ഗം ആയിരുന്നപ്പോൾ നമുക്ക് അവിശ്വസനീയമായ ഒരു ചരിത്രം ഉണ്ടായിരുന്നു അത് എല്ലാവർക്കും ഇഷ്ടമാണ്. ശേഷം നമ്മൾ അത് പ്രതിരോധ വിഭാ​ഗം എന്ന് പുനഃർനാമകരണം ചെയ്തു.’ ട്രംപ് പറഞ്ഞു. യുദ്ധവിഭാ​ഗം എന്ന് പേര് മാറ്റുന്നതിന് കോൺ​ഗ്രസിന്റെ അനുമതി തേടുക എന്നത് ഔപചാരികതയാണെന്നുമാണ് ട്രംപ് പ്രതികരിച്ചത്. ‘ഞങ്ങൾ അത് ചെയ്യാൻ പോകുകയാണ്. എനിക്കുറപ്പുണ്ട് കോൺ​ഗ്രസ് അതിന്റെ കൂടെ നിൽക്കുമെന്ന്.’ ട്രംപ് കൂട്ടിചേർത്തു. ഒന്നും രണ്ടും ലോകയുദ്ധവേളയിൽ അമേരിക്കക്ക് യുദ്ധവിഭാ​ഗമായിരുന്നെന്നും, യുദ്ധവിഭാ​ഗത്തിന്റെ കീഴിൽ അവിശ്വസനീയമായ ചരിത്രമായിരുന്നു അമേരിക്കക്ക് ഉണ്ടായിരുന്നതെന്നുമാണ് ട്രംപ് ഭരണകൂടത്തിന്റെ വാദം.

ഇന്ത്യ-പാകിസ്താൻ യുദ്ധം, റഷ്യ-യുക്രൈൻ യുദ്ധം, ഫലസ്തീനിൽ ഇസ്രയേൽ നടത്തുന്ന കയ്യേറ്റങ്ങൾ അവസാനനിപ്പിച്ചു എന്ന വാദം ഉയർത്തുകയും ട്രംപ് ചെയ്തിരുന്നു. ഇതിന്റെ പശ്ചാത്തലത്തിൽ താൻ സമാധാനത്തിനുള്ള നോബേൽ സമ്മാനം അർഹിക്കുന്നുണ്ട് എന്ന് ട്രംപ് അവകാശപ്പെട്ടിരുന്നു. എന്നാൽ, യുദ്ധവിഭാ​ഗം എന്ന പേര് മാറ്റം ട്രംപിന്റെ നോബേൽ സമ്മാനത്തിന് മങ്ങലേൽപ്പിക്കുമെന്നാണ് വിദ​ഗ്ദർ അഭിപ്രായപ്പെടുന്നത്.