മാവോയിസ്റ്റ് നേതാവ് വിക്രം ഗൗഡ കൊല്ലപ്പെട്ടു

ഉഡുപ്പി : സിപിഐ മാവോയിസ്റ്റ് ഉന്നത നേതാവ് വിക്രം ഗൗഡ കൊല്ലപ്പെട്ടു. കർണാടക പോലീസിൻ്റെ ആൻ്റി നക്സൽ സ്ക്വാഡും മാവോയിസ്റ്റുകളും തമ്മിലുണ്ടായ ഏറ്റുമുട്ടലിലാണ് സംഭവം. ദക്ഷിണേന്ത്യയിലെ മാവോയിസ്റ്റ് മിലിറ്ററി ഓപ്പറേഷൻസ് നേതാവായിരുന്നു വിക്രം ഗൗഡ. ഏറ്റുമുട്ടലിനിടെ മൂന്ന് മുതിർന്ന മാവോയിസ്റ്റ് നേതാക്കൾ രക്ഷപ്പെട്ടു. ജയണ്ണ, വനജാക്ഷി, ലത എന്നിവരാണ് രക്ഷപ്പെട്ടതെന്നാണ് വിവരം. ഇവ‍ർക്കായുള്ള തെരച്ചിൽ വനമേഖലയിൽ തുടരുകയാണ്.

കർണാടകത്തിലെ ഉഡുപ്പി ജില്ലയിലെ കാർക്കള താലൂക്കിലെ സീതാമ്പൈലു വനമേഖലയിൽ തിങ്കളാഴ്ച നടന്ന ഏറ്റുമുട്ടലിലാണ് സംഭവം. മലപ്പുറം നിലമ്പൂ‍രിൽ ഉണ്ടായ ഏറ്റുമുട്ടലിൽനിന്ന് രക്ഷപ്പെട്ട മാവോയിസ്റ്റ് നേതാവായിരുന്നു വിക്രം ഗൗഡ. 2016ലായിരുന്നു നിലമ്പൂ‍ർ വനമേഖലയിൽ കേരള പോലീസിൻ്റെ ആൻ്റി നക്സൽ സ്ക്വാഡും മാവോയിസ്റ്റുകളും തമ്മിൽ ഏറ്റുമുട്ടൽ ഉണ്ടായത്. സിപിഐ (മാവോയിസ്റ്റ്) കേന്ദ്ര കമ്മിറ്റി അംഗം കൊപ്പം ദേവരാജൻ, അജിത (കാവേരി) എന്നിവർ അന്ന് കൊല്ലപ്പെട്ടിരുന്നു.

കർണാടകത്തിലെ കുടക് ജില്ലയിൽ ഈ വർഷം മാർച്ചിൽ വിക്രം ഗൗഡയുടെ സാന്നിധ്യം കർണാടക പോലീസ് സ്ഥിരീകരിച്ചിരുന്നു. കേരളവുമായി അതിർത്തി പങ്കിടുന്ന കുടകിലെ ഒരു ഗ്രാമത്തിൽ വിക്രം ഗൗഡ ഉൾപ്പെട്ട മാവോയിസ്റ്റ് സംഘം എത്തി മാവോയിസ്റ്റ് ആശയം പ്രചരിപ്പിക്കുകയും ഗ്രാമവാസികളിൽനിന്ന് പലചരക്ക് സാധനങ്ങൾ വാങ്ങുകയും ചെയ്തെന്നായിരുന്നു പോലീസ് കണ്ടെത്തിയത്. ഇതേ തുടർന്ന് കുടക്, ഹാസൻ ജില്ലകളോട് ചേർന്ന വനമേഖലകളിലേക്ക് കർണാടക പോലീസ് അന്വേഷണം വ്യാപിപ്പിക്കുകയും സേനാവിന്യാസം വർധിപ്പിക്കുകയും ചെയ്തിരുന്നു. മാവോയിസ്റ്റ് കബിനി ദളത്തിലെ കന്നഡ സംസാരിക്കുന്ന അംഗങ്ങൾ കേരളത്തിൽനിന്ന് കർണാടകത്തിലേക്ക് ചേക്കേറാൻ ശ്രമം തുടങ്ങിയെന്ന് ആൻ്റി നക്സൽ സ്ക്വാഡ് ഉദ്യോഗസ്ഥരെ ഉദ്ധരിച്ചുള്ള റിപ്പോർട്ടുകൾ നേരത്തെ പുറത്തുവന്നിരുന്നു.