എന്തായി പടക്ക നിരോധനം? ഡല്‍ഹി സര്‍ക്കാരിനോട് സുപ്രീംകോടതി

ന്യൂഡല്‍ഹി : വായുമലിനീകരണം ക്രമാതീതമായി ഉയര്‍ന്ന സാഹചര്യത്തില്‍ പടക്ക നിരോധനം സംബന്ധിച്ച് എന്ത് നടപടികളാണ് സ്വീകരിച്ചതെന്ന് ഡല്‍ഹി സര്‍ക്കാരിനോട് ആരാഞ്ഞ് സുപ്രീംകോടതി. രാജ്യ തലസ്ഥാനമായ ഡല്‍ഹിയില്‍ വായുമലിനീകരണം അതിരൂക്ഷമാണ്. ദീപാവലി ആഘോഷങ്ങള്‍ കൂടി കഴിഞ്ഞതോടെ പുകകൊണ്ട് മൂടപ്പെട്ടിരിക്കുകയാണ് ഡല്‍ഹി നഗരം.

വായുമലിനീകരണം രൂക്ഷമാകുന്ന സാഹചര്യത്തില്‍ ഡല്‍ഹിയില്‍ പടക്കങ്ങളും പൂത്തിരികളും വായുമലിനീകരണത്തിന് കാരണമാകുന്ന മറ്റ് വസ്തുക്കളും ഉപയോഗിക്കുന്നതിന് നിരോധനമുണ്ട്. ഇത് പേപ്പറില്‍ മാത്രമായി ഒതുങ്ങുന്നു എന്നാണ് നിലവിലെ സ്ഥിതി തെളിയിക്കുന്നതെന്ന് സുപ്രീംകോടതി പറഞ്ഞു. നിരോധനം നടപ്പിലാക്കാന്‍ ഡല്‍ഹി സര്‍ക്കാരും പൊലീസും എന്തൊക്കെ നടപടികളാണ് എടുത്തതെന്ന രേഖകള്‍ ഹാജരാക്കണമെന്നാണ് സുപ്രീംകോടതി ആവശ്യപ്പെട്ടിരിക്കുന്നത്.

കേന്ദ്ര മലിനീകരണ നിയന്ത്രണ ബോര്‍ഡ് ഞായറാഴ്ച പുറത്തുവിട്ട റിപ്പോര്‍ട്ട് പ്രകാരം ലോകത്തിലെ ഏറ്റവും മോശം നിലവാരമുള്ള വായു ഡല്‍ഹിയിലേതാണ്. ഡല്‍ഹിയിലെ വായു ഗുണനിലവാര സൂചിക 382 ആണ്. ഡല്‍ഹിയിലെ വായുമലിനീകരണവുമായി ബന്ധപ്പെട്ട് ഒരുവര്‍ഷമായി നടന്നുകൊണ്ടിരിക്കുന്ന കേസുമായി ബന്ധപ്പെട്ടാണ് സുപ്രീംകോടതി തിങ്കളാഴ്ച ഈ വിഷയത്തെക്കുറിച്ച് ചോദ്യങ്ങള്‍ ഉന്നയിച്ചത്. 2025ഓടെയെങ്കിലും നിരോധനം ‘പേപ്പറിലല്ല’ യഥാര്‍ത്ഥത്തില്‍ നടപ്പിലാക്കണമെന്നും സുപ്രീംകോടതി ആവശ്യപ്പെട്ടു.