സഞ്ജുവിന് തിളങ്ങാനായില്ല, ഇന്ത്യക്ക് രണ്ടാം ജയം

പല്ലക്കല്ലെ: രണ്ടാം ട്വന്റി20യിൽ ഏഴു വിക്കറ്റ് വിജയവുമായി ശ്രീലങ്കയ്ക്കെതിരായ പരമ്പര സ്വന്തമാക്കി ഇന്ത്യ. ഡക്ക്‌വർത്ത് ലൂയിസ് നിയമപ്രകാരം എട്ട് ഓവറിൽ 78 റൺസായിരുന്നു ഇന്ത്യയുടെ വിജയലക്ഷ്യം.  ഒൻപതു പന്തുകൾ ബാക്കി നിൽക്കെയാണ് ഇന്ത്യ വിജയ റണ്‍സ് കുറിച്ചത്. സ്കോർ ശ്രീലങ്ക– 20 ഓവറിൽ ഒൻപതിന് 161, ഇന്ത്യ– 6.3 ഓവറിൽ മൂന്നിന് 81. 26 റൺസ് വഴങ്ങി മൂന്നു വിക്കറ്റുകൾ വീഴ്ത്തിയ രവി ബിഷ്ണോയിയാണ് കളിയിലെ താരം.

മറുപടി ബാറ്റിങ്ങിൽ ഓപ്പണർ യശസ്വി ജയ്സ്വാൾ (15 പന്തിൽ 30), സൂര്യകുമാർ യാദവ് (12 പന്തിൽ 26), ഹാർദിക് പാണ്ഡ്യ (ഒൻപതു പന്തിൽ 22) എന്നിവർ തിളങ്ങി. ഓപ്പണറായി ഇറങ്ങിയ മലയാളി താരം സഞ്ജു സാംസൺ നേരിട്ട ആദ്യ പന്തിൽ പുറത്തായി. മഹീഷ് തീക്ഷണയുടെ പന്തിൽ താരം ബോൾഡാകുകയായിരുന്നു.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ശ്രീലങ്ക 20 ഓവറിൽ ഒൻപതു വിക്കറ്റ് നഷ്ടത്തിൽ 161 റൺസെടുത്തു. കുശാൽ പെരേര അർധ സെഞ്ചറി നേടി. 34 പന്തുകൾ നേരിട്ട കുശാൽ 53 റൺസാണു നേടിയത്. ഓപ്പണർ പാതും നിസംഗ (24 പന്തിൽ 32), കമിന്ദു മെൻഡിസ് (23 പന്തിൽ 26) എന്നിവരും ശ്രീലങ്കയ്ക്കു കരുത്തായി. ഇന്ത്യയ്ക്കായി സ്പിന്നർ രവി ബിഷ്ണോയി മൂന്നു വിക്കറ്റുകൾ വീഴ്ത്തി. അർഷ്ദീപ് സിങ്, അക്ഷർ പട്ടേൽ, ഹാർദിക് പാണ്ഡ്യ എന്നിവർ രണ്ടു വിക്കറ്റുകൾ വീതവും സ്വന്തമാക്കി. മഴ കാരണം വൈകിയാണു കളി തുടങ്ങിയത്.