അഭിപ്രായഭിന്നതകൾ ഉപേക്ഷിച്ച് ദേശീയക്ഷേമത്തിനായി ഒരുമിച്ച് നിൽക്കൂ : പ്രതിപക്ഷത്തോട് മോദി

ന്യൂഡൽഹി : മൂന്നാം മോദി സർക്കാരിന്റെ ആദ്യ ബജറ്റ് സമ്മേളനത്തിന് പാർലമെന്റിൽ തുടക്കമായി. പ്രധാനമന്ത്രി നരേന്ദ്രമോദിയുടെ അഭിസംബോധനയോടെ ആണ് ആദ്യ ദിനം ആരംഭിച്ചത്. ജനകീയ ബജറ്റ് ആയിരിക്കുമെന്നും അമൃത കാലത്തെ സുപ്രധാന ബജറ്റാണ് അവതരിപ്പിക്കുന്നതെന്നും നരേന്ദ്രമോദി പറഞ്ഞു. ബജറ്റ് സമ്മേളനത്തിന് മുമ്പ് പാർലമെൻ്റ് സമുച്ചയത്തിൽ നിന്ന് ജനങ്ങളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

2024ലേക്കുള്ള റോഡ് മാപ്പ് കൂടിയാണ് ഈ ബജറ്റെന്നും മോദി കൂട്ടിച്ചേർത്തു. ജനങ്ങളുടെ ആവശ്യങ്ങളുടെ പൂർത്തീകരണത്തിന് ഒന്നിച്ച് നീങ്ങണം. രാജ്യത്തിന്റെ വികസനത്തിന് വിദ്വേഷം മാറ്റിവെച്ച് പ്രതിപക്ഷം സഹകരിക്കണമെന്നും അദ്ദേഹം പറഞ്ഞു. അഭിപ്രായഭിന്നതകൾ ഉപേക്ഷിച്ച് ദേശീയ ക്ഷേമത്തിനായി ഒരുമിച്ച് ചേരാൻ പ്രതിപക്ഷത്തോട് ആഹ്വാനം ചെയ്ത അദ്ദേഹം, എല്ലാ പാർട്ടികളോടും പാർട്ടി ലൈനുകൾക്ക് അതീതമായി ഉയർന്ന് രാജ്യത്തിനായി സ്വയം സമർപ്പിക്കാനും പാർലമെൻ്റിൻ്റെ ഈ മാന്യമായ വേദി ഉപയോഗിക്കാനും ആവശ്യപ്പെട്ടു.

60 വർഷത്തിന് ശേഷം ഒരു സർക്കാർ മൂന്നാം തവണയും തുടർച്ചയായി അധികാരത്തിൽ വരികയും ബജറ്റ് അവതരിപ്പിക്കുകയും ചെയ്യുന്നത് അഭിമാനകരമാണെന്ന് മോദി പറഞ്ഞു. ഈ ബജറ്റ് നമ്മുടെ അടുത്ത 5 വർഷത്തെ ഭരണത്തിൻ്റെ ദിശ തീരുമാനിക്കും. വികസിത ഇന്ത്യ എന്ന നമ്മുടെ സ്വപ്നത്തിന് ഈ ബജറ്റ് ശക്തമായ അടിത്തറയാകുമെന്നും അദ്ദേഹം കൂട്ടിച്ചേർത്തു. ‘ഇന്ന് ശ്രാവണമാസത്തെ ആദ്യ തിങ്കളാഴ്ചയാണ്. പാർലമെൻ്റിന്റെ വർഷകാല സമ്മേളനം ഇന്ന് ആരംഭിക്കുകയാണ്. ഇന്ന് രാജ്യം മുഴുവൻ സഭയിലേക്കാണ് ഉറ്റുനോക്കുന്നത്. ഇതൊരു സർ​ഗാത്മകമായ സമ്മേളനം ആയിരിക്കണം. ഇതൊരു പോസിറ്റീവ് സെഷനായിരിക്കണം…,’- നരേന്ദ്ര മോദി പറഞ്ഞു.  നാളെയാണ് ധനമന്ത്രി നിർമല സീതാരാമൻ കേന്ദ്ര ബജറ്റ് അവതരിപ്പിക്കുന്നത്.