മുംബൈയിൽ കനത്ത മഴ,  ട്രെയിനുകൾ റദ്ദാക്കി; വിമാനങ്ങൾ വഴിതിരിച്ചു വിട്ടു

മുംബൈ : കനത്ത മഴയിൽ മുങ്ങി മുംബൈ നഗരം. പല പ്രദേശങ്ങളും വെള്ളത്തിനടിയിലാണ്. ഗതാഗത കുരുക്കും വ്യാപമാണ്. നിർത്താതെ മഴ പെയ്യുന്ന സാഹചര്യമാണ് നിലവിൽ മുംബൈയിൽ ഉള്ളത്. റെയിൽവേ ട്രാക്കുകളി‍ൽ വെള്ളക്കെട്ട് രൂപ്പെട്ടതിനാൽ ട്രെയിൻ സർവീസുകൾ താത്കാലികമായി നിർത്തി വച്ചു. സ്കുളുകൾക്കും അവധി പ്രഖ്യാപിച്ചിട്ടുണ്ട്.  മുംബൈ വിമാനത്താവളത്തിലേക്കുള്ള  27 വിമാനങ്ങൾ മറ്റ് വിമാനത്താവളങ്ങളിലേക്ക് വഴിതിരിച്ചുവിടുകയും ചെയ്തു,

മഴയിലും കാറ്റിലും ട്രാക്കിൽ മരം വീണു. ‌‌‌കല്യാൺ-കാസറ സെക്ഷനിലെ ഖദാവ്‌ലിക്കും ടിറ്റ്‌വാലയ്‌ക്കും ഇടയിലുള്ള ലോക്കൽ ട്രെയിൻ ഗതാഗതം തടസപ്പെട്ടു. കനത്ത മഴ തുടരുമെന്നാണ് പ്രവചനം. പുലർച്ചെ 1 മുതൽ രാവിലെ 7 വരെയുള്ള ആറ് മണിക്കൂറിനുള്ളിൽ നഗരത്തിൽ പെയ്തിറങ്ങിയത് 300 മില്ലിമീറ്ററിലധികം മഴയാണ്.അന്ധേരി, കുർള, ഭാണ്ഡൂപ്പ്, കിംഗ്സ് സർക്കിൾ, വിലെ പാർലെ, ദാദർ എന്നിവയുൾപ്പെടെ നിരവധി പ്രദേശങ്ങളിൽ വെള്ളക്കെട്ട് രൂപപ്പെട്ടു. ഇന്ത്യയുടെ സാമ്പത്തിക തലസ്ഥാനത്തിൻ്റെ പല ഭാഗങ്ങളിലും ഗതാഗതം സ്തംഭിച്ചു.

സ്‌കൂളുകൾ അടച്ചു: പൗരസമിതിയുടെ അധികാരപരിധിയിലുള്ള സർക്കാർ, സ്വകാര്യ സ്‌കൂളുകൾക്കും കോളേജുകൾക്കും ബിഎംസി അർദ്ധ ദിവസത്തെ അവധി പ്രഖ്യാപിച്ചു. ഉച്ചകഴിഞ്ഞുള്ള ക്ലാസുകളുടെ തീരുമാനം പിന്നീട് അറിയിക്കും. കനത്ത മഴ സബർബൻ ട്രെയിൻ സർവീസുകളും ബെസ്റ്റ് ബസ് സർവീസുകളും തടസ്സപ്പെടുത്തി. നിരവധി ബെസ്റ്റ് ബസുകൾ അവയുടെ പതിവ് റൂട്ടുകളിൽ നിന്ന് വഴിതിരിച്ചുവിട്ടതായി അധികൃതർ പറഞ്ഞു.

ട്രെയിനുകൾ റദ്ദാക്കി: MMR-CSMT (12110), പൂനെ-CSMT (11010), പൂനെ-CSMT ഡെക്കാൻ (12124), പൂനെ-CSMT ഡെക്കാൻ (11007), CSMT-പൂണെ ഇൻ്റർസിറ്റി എക്സ്പ്രസ് (12127) ട്രെയിനുകൾ സെൻട്രൽ റെയിൽവേ റദ്ദാക്കി. ട്രാക്കുകളിൽ നിന്ന് വെള്ളം ഇറങ്ങിയതിനെ തുടർന്ന് ലോക്കൽ ട്രെയിൻ സർവീസുകളും താൽക്കാലികമായി നിർത്തിവച്ച് പിന്നീട് പുനരാരംഭിച്ചു.