മാസപ്പടി കേസ്: മാത്യു കുഴൽനാടൻ്റെ ഹർജി ഇന്ന് ഹൈക്കോടതി പരിഗണനയ്ക്ക്

കൊച്ചി : മുഖ്യമന്ത്രിക്കും മകൾക്കും എതിരായ മാത്യു കുഴൽനാടൻ്റെ മാസപ്പടി കേസ് ഇന്ന് ഹൈക്കോടതി പരിഗണിക്കും. വിജിലൻസ് കോടതി വിധി റദ്ദാക്കണമെന്നാവശ്യപ്പെട്ടാണ് ഹർജി. മുഖ്യമന്ത്രിയുൾപ്പെടെയുള്ളവർക്കെതിരെ അന്വേഷണം വേണ്ടെന്ന തിരുവനന്തപുരം വിജിലൻസ് കോടതി ഉത്തരവിന് പിന്നാലെ താൻ തെളിവുകൾ ഹൈക്കോടതിയിൽ ഹാജരാക്കുമെന്ന് മാത്യു കുഴൽനാടൻ വ്യക്തമാക്കിയിരുന്നു.

മാത്യു കുഴൽനാടൻ എം.എൽ.എ സമര്‍പ്പിച്ച ഹരജി തള്ളാൻ തിരുവനന്തപുരം വിജിലൻസ് കോടതി ചൂണ്ടിക്കാണിച്ചത് പ്രധാനമായും ആറുകാരണങ്ങളായിരുന്നു. രേഖകള്‍ ഹാജരാക്കുന്നതില്‍ കുഴൽനാടൻ പരാജയപ്പെട്ടെന്നും തെളിവിന് പകരം ആരോപണങ്ങൾ മാത്രമാണ് അവതരിപ്പിച്ചതെന്നും കോടതി ചൂണ്ടിക്കാട്ടി.മുഖ്യമന്ത്രി, മകൾ വീണ വിജയൻ, സിഎംആറിലെ മറ്റ് അംഗങ്ങൾ എന്നിവർക്കെല്ലാം ഹൈക്കോടതി നോട്ടീസ് അയച്ചിരുന്നു. ഇതിൽ മുഖ്യമന്ത്രി പ്രതികരിച്ചിട്ടില്ല. കോടതിയിൽ എന്ത് നിലപാടാണ് സ്വീകരിക്കുക എന്നതും പ്രതിപക്ഷം ഉറ്റുനോക്കുന്ന വിഷയമാണ്.

ഹർജി തള്ളാനുള്ള കാരണങ്ങൾ

• ഹർജി അഴിമതിനിരോധന നിയമത്തിൻ്റെ പരിധിയിൽ വരില്ല
• ഇന്‍ററിം സെറ്റിൽമെന്‍റ് ബോർഡ് സിഎംആർഎൽ പണം നൽകിയെന്ന് പറയുന്ന മറ്റാർക്കെതിരെയും ഹരജിക്കാരൻ അന്വേഷണം ആവശ്യപ്പെടുന്നില്ല.
• കൃത്യമായ തെളിവില്ലാതെ സർക്കാറിൻ്റെ നയപരമായ കാര്യങ്ങളിൽ കോടതിക്ക് ഇടപെടാൻ കഴിയില്ല.
• സിഎംആർഎൽ കമ്പനിക്ക് സർക്കാർ മിച്ചഭൂമി ഇളവ് നൽകിയിട്ടില്ല.
• ആരോപണങ്ങൾ തെളിയിക്കുന്ന രേഖകൾ ഹാജരാക്കുന്നതിൽ ഹരജിക്കാരൻ പരാജയപ്പെട്ടു.
• ഇവേ ബില്ലുകൾ തെളിവായി സ്വീകരിക്കാൻ കഴിയില്ല.