ഈ സീസണോടെ മതിയാക്കുന്നു, ടോണി ക്രൂസ് വിരമിക്കൽ പ്രഖ്യാപിച്ചു

റയൽ മാഡ്രിഡ് മധ്യനിര താരം ടോണി ക്രൂസ് ഫുട്‍ബോളിൽ നിന്നുള്ള വിരമിക്കൽ പ്രഖ്യാപിച്ചു.  ഒരു ഔദ്യോഗിക പ്രസ്താവനയിലൂടെ ആണ് ക്രൂസ് വിരമിക്കൽ പ്രഖ്യാപിച്ചത്. യൂറോ കപ്പോടെ അന്താരാഷ്‌ട്ര ഫുട്ബോൾ കരിയറും ഈ സീസണോടെ റയൽ മാഡ്രിഡ് കരിയറും  അവസാനിപ്പിക്കും എന്ന് അദ്ദേഹം പ്രഖ്യാപിച്ചു. ചാമ്പ്യൻസ് ലീഗ് ഫൈനൽ ആകും ക്രൂസിന്റെ റയൽ മാഡ്രിഡിനായുള്ള അവസാന മത്സരം.

റയൽ മാഡ്രിഡ് തന്റെ അവസാന ക്ലബ് ആയിരിക്കും എന്ന് നേരത്തെ ക്രൂസ് പറഞ്ഞിരുന്നു. ഇന്നും താരം അത് ആവർത്തിച്ചു. ഈ സീസണിൽ മികച്ച പ്രകടനം നടത്തുന്ന ക്രൂസ് അടുത്തിടെ അന്താരാഷ്ട്ര ഫുട്ബോളിലേക്കും തിരികെ എത്തിയിരുന്നു. ജർമ്മനിയിൽ നടക്കുന്ന യൂറോ കപ്പോടെ ക്രൂസിന്റെ കരിയറിന് അവസാനമാകും. 2014ൽ ആയിരുന്നു ക്രൂസ് റയൽ മാഡ്രിഡിൽ എത്തിയത്. റയലിനൊപ്പം നിരവധി കിരീടങ്ങൾ താരം നേടി. നാലു ചാമ്പ്യൻസ് ലീഗ് കിരീടങ്ങളും മൂന്ന് ലാലിഗ കിരീടവും ഉൾപ്പെടെ 21 കിരീടങ്ങൾ താരം റയൽ മാഡ്രിഡിൽ ഇതുവരെ സ്വന്തമാക്കിയിട്ടുണ്ട്.