പാർക് ഡെസ് പ്രിൻസെസിൽ ബാർസ; ​ഗ്രീസ്മാന്റെ മികവിൽ അത്ലറ്റിക്കോ

യുവേഫ ചാമ്പ്യൻസ് ലീ​ഗിന്റെ ക്വാർട്ടർ ആദ്യ പാദത്തിൽ ബാർസലോണക്കും അത്ലറ്റിക്കോ മാഡ്രിഡിനും ജയം. ബാർസ രണ്ടിനെതിരെ മൂന്ന് ​ഗോളുകൾക്ക് പിഎസ്ജിയെ തോൽപ്പിച്ചപ്പോൾ ഡോർട്ട്മുണ്ടിനെതിരെ ഒന്നിനെതിരെ രണ്ട് ​ഗോളുകൾക്കായിരുന്നു അത്ലറ്റിക്കോയുടെ ജയം. പിഎസ്ജിയുടെ മൈതാനമായ പാർക് ഡെസ് പ്രിൻസെസിൽ രണ്ടാം പകുതിയിലായിരുന്നു ​കൂടുതൽ ഗോളുകൾ പിറന്നത്. ആദ്യ പകുതിയിലെ 37ാം മിനുട്ടിൽ ബ്രസീൽ താരം റാഫീഞ്ഞയിലൂടെ ബാർസയാണ് ആദ്യം മുന്നിലെത്തിയത്. എന്നാൽ രണ്ടാം പകുതിയിൽ ഉസ്മാൻ ഡെമ്പലെ, വിറ്റിന്യ എന്നിവരിലൂടെ പിഎസ്ജി തിരിച്ചടിച്ചു. 48, 50 മിനുട്ടുകളിലായിരുന്നു ​ഗോളുകൾ. 62ാം മിനുട്ടിൽ രണ്ടാം ​ഗോൾ നേടി റാഫീഞ്ഞ ബാർസയെ ഒപ്പമെത്തിച്ചു. 77ാം മിനുട്ടിൽ കോർണർ കിക്കിൽ നിന്ന് ആന്ദ്രേ ക്രിസ്റ്റ്യൻസനാണ് ബാർസയുടെ മൂന്നാം ​ഗോൾ നേടിയത്. രണ്ടാം പാദം 17ന് ബാർസലോണയുടെ ഹോം ​ഗ്രൗണ്ടിൽ നടക്കും.

ഫ്രഞ്ച് താരം അന്റോയിൻ ​ഗ്രീസ്മാന്റെ മികവിലായിരുന്നു അത്ലറ്റിക്കോയുടെ മുന്നേറ്റം. 4ാം മിനുട്ടിൽ മധ്യനിര താരം റോഡ്രി​ഗ്രോ ഡിപോളിന്റെ ​ഗോളിൽ മുന്നിലെത്തിയ അത്ലറ്റിക്കോ 32ാം മിനുട്ടിൽ സാമുവേൽ ലിനോയിലൂടെ ലീഡ് രണ്ടാക്കി. 81ാം മിനുട്ടിൽ സെബാസ്റ്റ്യൻ ഹാളറാണ് ഡോർട്ട്മുണ്ടിന്റെ ആശ്വാസ ​ഗോൾ നേടിയത്. മത്സരത്തിൽ അത്ലറ്റിക്കോ 9 ​ഗോളവസരങ്ങൾ സൃഷ്ടിച്ചപ്പോൾ ഡോർട്ട്മുണ്ടിന്റെ ശ്രമം നാലിൽ ഒതുങ്ങി. രണ്ടാം പാദം 17ന് ഡോർട്ട്മുണ്ടിന്റെ ഹോം ​ഗ്രൗണ്ടിലാണ്.