കൊൽക്കത്ത : 400-ലധികം സീറ്റുകൾ നേടുകയെന്ന ബിജെപിയുടെ ലക്ഷ്യത്തെ പരിഹസിച്ച്  പശ്ചിമ ബംഗാൾ മുഖ്യമന്ത്രി മമത ബാനർജി. കുറഞ്ഞത് 200 മണ്ഡലങ്ങളെങ്കിലും വിജയിക്കാൻ മമത ബിജെപിയെ വെല്ലുവിളിച്ചു. ബംഗാളിൽ  പൗരത്വ ഭേദഗതി നിയമം നടപ്പാക്കാൻ അനുവദിക്കില്ലെന്നും മമത ബാനർജി ഉറപ്പിച്ചു പറഞ്ഞു.സിഎഎയ്ക്ക് അപേക്ഷിക്കുന്നത് ഒരു അപേക്ഷകനെ വിദേശിയാക്കി മാറ്റും – ടിഎംസി സ്ഥാനാർത്ഥി മഹുവ മൊയ്ത്രയെ പിന്തുണച്ച് കൃഷ്ണനഗറിൽ തിരഞ്ഞെടുപ്പ് റാലിയിൽ സംസാരിക്കവെ അവർ പറഞ്ഞു.

“400 പാർ” എന്നാണ് ബിജെപി പറയുന്നത്. ആദ്യം 200 സീറ്റുകളുടെ മാനദണ്ഡം മറികടക്കാൻ ഞാൻ അവരെ വെല്ലുവിളിക്കുന്നു. 2021 ലെ നിയമസഭാ തിരഞ്ഞെടുപ്പിൽ അവർ 200-ലധികം സീറ്റുകളിൽ മത്സരിച്ചു. എന്നാൽ 77 ൽ ഒതുങ്ങേണ്ടി വന്നു.” അവർ പറഞ്ഞു.  ബിജെപിക്കെതിരെ ശബ്ദിച്ചതിനാൽ ഞങ്ങളുടെ എംപി മഹുവ മൊയ്‌ത്രയെ  അപകീർത്തിപ്പെടുത്തുകയും ലോക്‌സഭയിൽ നിന്ന് പുറത്താക്കുകയും ചെയ്തുവെന്നും അവർ കൂട്ടിച്ചേർത്തു.

പശ്ചിമ ബംഗാളിൽ ബിജെപിയുമായി കൈകോർത്തതിന് പ്രതിപക്ഷ  ഇന്ത്യാ മുന്നണി പങ്കാളികളായ സിപിഎമ്മിനെയും കോൺഗ്രസിനെയും മമതാ ബാനർജി ആക്ഷേപിച്ചു. “പശ്ചിമ ബംഗാളിൽ ഇന്ത്യാ സഖ്യമില്ല. ബംഗാളിൽ സിപിഎമ്മും കോൺഗ്രസും ബിജെപിക്ക് വേണ്ടിയാണ് പ്രവർത്തിക്കുന്നത്.”  “നിയമപരമായ പൗരന്മാരെ വിദേശികളാക്കാനുള്ള ഒരു കെണിയാണ് സിഎഎ. പശ്ചിമ ബംഗാളിൽ സിഎഎയോ എൻആർസിയോ ഞങ്ങൾ അനുവദിക്കില്ല.” ഈ മാസം ആദ്യം പരിക്കേറ്റതിന് തുടർന്ന് വിശ്രമത്തിലായിരുന്ന മമതയുടെ തിരഞ്ഞെടുപ്പ് സീസണിലെ ആദ്യ റാലിയെ അഭിസംബോധന ചെയ്തു സംസാരിക്കയാണ് ബിജെപിക്കെതിരെ ആഞ്ഞടിച്ചത്.