ഫഹദ് ഫാസിലിന്റെ ആവേശത്തിലെ പുതിയ ഗാനം പുറത്ത്; ഇലുമിനാറ്റിയെ ഏറ്റെടുത്ത് പ്രേക്ഷകർ

ഫഹദ് ഫാസിലിനെ നായകനാക്കി ജിത്തു മാധവൻ സംവിധാനം ചെയ്യുന്ന ആവേശത്തിലെ ​ഗാനം പുറത്ത്. വൻ പ്രേക്ഷക പ്രശംസയാണ് ​ഗാനത്തിന് ലഭിക്കുന്നത്. വിനായക് ശശികുമാർ രചിച്ച് സുഷിൻ ശ്യാം സംഗീതം നൽകിയ ഗാനത്തിന്റെ പേര് ‘ഇലുമിനാറ്റി’ എന്നാണ്. പ്രശസ്ത റാപ്പർ ഡാബ്സീയാണ് ഗാനം ആലപിച്ചിരിക്കുന്നത്. ഫഹദിന്റെ ഫസ്റ്റ് ലുക്ക് വെച്ചുള്ള ​ഗാനം പ്രേക്ഷകരുടെ ഇഷ്ട ലിസ്റ്റിലേക്ക് മാറുകയാണ്.

അൻവർ റഷീദ് എന്റർടൈൻമെന്റ്‌സിന്റെ ബാനറിൽ അൻവർ റഷീദും ഫഹദ് ഫാസിൽ ആൻഡ് ഫ്രണ്ട്‌സിന്റെ ബാനറിൽ നസ്രിയ നസീമും ചേർന്നാണ് സിനിമ നിർമിക്കുന്നത്. രോമാഞ്ചത്തിന് ശേഷം ജിത്തു മാധവൻ സംവിധാനം ചെയ്യുന്ന സിനിമ കൂടിയാണിത്. കോളേജ് വിദ്യാർത്ഥികളും അവരെ സഹായിക്കാനെത്തുന്ന ഗുണ്ടയുടെയും കഥ പറയുന്ന ആവേശം, ഭീഷ്മപർവ്വം എന്ന സൂപ്പർ ഹിറ്റിനു ശേഷം എ&എ റിലീസ് വിതരണം ചെയ്യുന്ന സിനിമ കൂടിയാണ്. ചിത്രം പെരുന്നാൾ – വിഷു റിലീസ് ആയി ഏപ്രിൽ 11 ന് തീയേറ്റുകളിൽ എത്തും.

ഫഹദിന് പുറമെ മൻസൂർ അലി ഖാൻ, ആശിഷ് വിദ്യാർത്ഥി, സജിൻ ഗോപു, പ്രമുഖ മലയാളി ഗെയിമറും യൂട്യൂബറുമായ ഹിപ്സ്റ്റർ, മിഥുൻ ജെഎസ്, റോഷൻ ഷാനവാസ്, പൂജ മോഹൻരാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ തുടങ്ങി നിരവധി പേർ ചിത്രത്തിൽ എത്തുന്നുണ്ട്.