ഏകാദശി നിറവിൽ കണ്ണനെ തൊഴുത് ദർശനപുണ്യം നേടി പതിനായിരങ്ങൾ

തൃശൂർ : ഏകാദശി നിറവിൽ കണ്ണനെ തൊഴുത് ദർശനപുണ്യം നേടി പതിനായിരങ്ങൾ. ദശമി ദിനമായ ഇന്നലെ നിർമ്മാല്യ ദർശനത്തോടെ തുറന്ന 
​ഗുരുവായൂർ ക്ഷേത്രനട നാളെ രാവിലെ എട്ടു മണിയോടെ അടയ്‌ക്കും. വിഐപി ദർശനത്തിന് ദേവസ്വവം ബോർഡ് നിയന്ത്രണം ഏർപ്പെടുത്തിയിരുന്നു.

രാവിലെ പഞ്ചവാദ്യം അകമ്പടിയോടെ കാഴ്ചശീവേലിക്ക് ശേഷം ശ്രീ ഗുരുവായൂരപ്പൻ പാർത്ഥസാരഥി ക്ഷേത്രത്തിലേക്ക് എഴുന്നള്ളി.
തിമിലയിൽ പല്ലശ്ശന മുരളീ മാരാർ, മദ്ദളം – കലാമണ്ഡലം ഹരി നാരായണൻ, ഇടക്ക – കടവല്ലൂർ മോഹനൻ മാരാർ, കൊമ്പ്-മച്ചാട് ഉണ്ണി നായർ, താളം-ഗുരുവായൂർ ഷൺമുഖൻ എന്നിവർ പഞ്ചവാദ്യത്തിന് കൊഴുപ്പേകി.

ഇന്നു രാവിലെ ഒൻപതു മണിക്ക് തുടങ്ങിയ പ്രസാദ ഊട്ട് വൈകിട്ട് ആറു മണിയോടെയാണ് അവസാനിച്ചത്. ഏകാദശി വിഭവങ്ങളോടെയുള്ള പ്രസാദ ഊട്ടിൽ നാൽപതിനായിരത്തിലേറെ പേർ പങ്കെടുത്തു.