മലയാളത്തിലെ ഒന്നാംനമ്പർ ന്യൂസ് ചാനലെന്ന കുത്തക നിലനിർത്തി ഏഷ്യാനെറ്റ് ന്യൂസ്, മുന്നേറ്റമില്ലാതെ റിപ്പോർട്ടർ

മലയാളത്തിലെ ഒന്നാംനമ്പർ ന്യൂസ് ചാനലെന്ന കുത്തക നിലനിർത്തി ഏഷ്യാനെറ്റ് ന്യൂസ്. രണ്ടാം സ്ഥാനത്തുള്ള ചാനലിനേക്കാൾ 19.27 പോയിന്റ് വ്യത്യാസത്തിലാണ് ഏഷ്യാനെറ്റ് ന്യൂസ് മുന്നിൽ നിൽക്കുന്നത്. 31 ആഴ്ചയിലെ ന്യൂസ് ചാനല്‍ പ്രേക്ഷകരുടെ എണ്ണം അളക്കുന്ന ടെലിവിഷന്‍ റേറ്റിങ്ങ് പോയിന്റ് (ടിആര്‍പി) പുറത്തുവന്നപ്പോള്‍ പ്രതീക്ഷിത കുതിപ്പ് നടത്താൻ കഴിയാതെ പോയത് റിപ്പോർട്ടർ ചാനലിനാണ്.

117.41 പോയിന്റുകളുമായാണ് ടിആര്‍പി റേറ്റിങ്ങില്‍ ഇത്തവണയും ഏഷ്യാനെറ്റ് ന്യൂസ് ഒന്നാം സ്ഥാനം നിലനിര്‍ത്തിയിരിക്കുന്നത്. പതിവ് പോലെ രണ്ടാം സ്ഥാനത്തുള്ളത് 24 ന്യൂസാണ്. ടിആര്‍പിയില്‍ 98.14 പോയിന്റാണ് ചാനലിന് ലഭിച്ചിരിക്കുന്നത്. 68.16 പോയിന്റുമായി മൂന്നാം സ്ഥാനത്തുള്ളത് മനോരമ ന്യൂസാണ്. മാതൃഭൂമി ന്യൂസിന് ഇത്തവണയും ടിആര്‍പി റേറ്റിങ്ങില്‍ വലിയ മുന്നേറ്റം കാഴ്ച വെയ്ക്കാന്‍ സാധിച്ചിട്ടില്ല. 50.59 പോയിന്റുമായ ചാനല്‍ മാതൃഭൂമി അഞ്ചാം സ്ഥാനത്താണുള്ളത്.

കഴിഞ്ഞ മൂന്നാഴ്ചയായി കൈരളി ന്യൂസ് ടിആര്‍പിയില്‍ നടത്തുന്ന മുന്നേറ്റം ഇക്കുറി നിലനിര്‍ത്താന്‍ സാധിച്ചിട്ടില്ല. കഴിഞ്ഞ ആഴ്ച്ചയെക്കാള്‍ ഒരു പോയിന്റ് പിന്നിലേക്ക് ചാനല്‍ വീണു. 21.13 പോയിന്റുമായി ആറാം സ്ഥാനത്താണ് കൈരളി ടിവിയുള്ളത്.  ജനം ടിവി ടിആര്‍പിയില്‍ ഇത്തവണ മുന്നേറ്റം കാഴ്ച വെച്ചിട്ടുണ്ട്. ഈ ആഴ്ചയില്‍ 20.06 പോയിന്റ് ചാനല്‍ നേടിയിട്ടുണ്ട്. ജനം ടിവിയുടെ തൊട്ടടുത്ത് തന്നെയാണ് ഇക്കുറിയും റിപ്പോര്‍ട്ടര്‍ ടിവിയുടെ സ്ഥാനം. ആറാം സ്ഥാനത്തുള്ള ജനം ടിവിയില്‍ നിന്നും വെറും 0.32പോയിന്റിന്റെ പിന്നില്‍ മാത്രമാണ് റിപ്പോര്‍ട്ടര്‍ ടിവി.

മുന്നത്തെ ആഴ്ചയ്ക്ക് അനുസരിച്ചുള്ള ക്രമാനുഗതമായ വളര്‍ച്ച റിപ്പോര്‍ട്ടറിന് ഈ ആഴ്ച്ച ഉണ്ടാക്കാനായിട്ടില്ല. കഴിഞ്ഞ ആഴ്ച ഏഴാം സ്ഥാനത്തേക്ക് കുതിച്ചെത്തിയ ചാനല്‍ സംഘപരിവാര്‍ ചാനലായ ജനത്തെയും സിപിഎം നിയന്ത്രണത്തിലുള്ള കൈരളി ന്യൂസിനെയും മറികടന്ന് അഞ്ചാം സ്ഥാനത്ത് എത്തുമെന്നാണ് പ്രതീക്ഷിച്ചിരുന്നു. എന്നാല്‍, അത്തരത്തിലൊരു മുന്നേറം റിപ്പോര്‍ട്ടര്‍ ടിവിക്ക് ഉണ്ടാക്കാന്‍ സാധിച്ചില്ലെന്ന് മാത്രമല്ല, വളര്‍ച്ച മുരടിക്കുകയും ചെയ്തു.

29 ആഴ്ചയിലെ ടിആര്‍പി റേറ്റിങ്ങ് പുറത്തുവന്നപ്പോള്‍ പുതിയ സാങ്കേതിക വിദ്യയോടെ സംപ്രേക്ഷണം ആരംഭിച്ച റിപ്പോര്‍ട്ടര്‍ ടിവി 11.71 പോയിന്റിലേക്ക് എത്തിയിരുന്നു. തുടര്‍ന്ന് 30 ആഴ്ചയില്‍ അത് 18.36 പോയിന്റായി ഉയര്‍ത്തുകയും ചെയ്തിരുന്നു. തുടര്‍ന്ന് കഴിഞ്ഞ ആഴ്ചയിലെ റേറ്റിങ്ങില്‍ 19.74 പോയിന്റ് നേടാന്‍ മാത്രമെ ചാനലിന് സാധിച്ചിട്ടുള്ളൂ.

ഏട്ടാം സ്ഥാനത്ത് 15.13 പോയിന്റുമായി ന്യൂസ് 18 കേരളയാണുള്ളത്. ന്യൂസ് ചാനലുകളില്‍ ഏറ്റവും പിന്നിലുള്ളത് രാജ് ന്യൂസ് മലയാളമാണ്. 0.34 പോയിന്റുകള്‍ നേടി ടിആര്‍പി റേറ്റിങ്ങില്‍ ഒന്‍പതാംസ്ഥാനത്താണ് രാജ് ന്യൂസ് ഇടം പിടിച്ചിരിക്കുന്നത്.