എംസി റോഡിൽ തിരുവല്ലയിൽ വെള്ളക്കെട്ട് , അപ്പർകുട്ടനാട്ടിൽ ജലനിരപ്പ് കുതിച്ചുയരുന്നു

തിരുവല്ല: സംസ്ഥാനത്ത് മഴ ശക്തമായി തുടരുന്നു. തിരുവല്ല തിരുമൂലപുരത്ത് എംസി റോഡില്‍ വെള്ളം കയറി. ഇതോടെ ഗതാഗതക്കുരുക്ക് രൂക്ഷമായി.പോലീസിന്‍റെയും നാട്ടുകാരുടെയും നിയന്ത്രണത്തിലാണ് ഇതുവഴിയുള്ള വാഹനഗതാഗതം പുരോഗമിക്കുന്നത്.

തിരുവല്ല അമ്പലപ്പുഴ സംസ്ഥാനപാതയില്‍ നെടുമ്പ്രത്തും വെള്ളംകയറി. പൊടിയാടി മുതല്‍ ചക്കുളത്തുകാവുവരെ കെഎസ്ആര്‍ടിസി സര്‍വീസ് നിര്‍ത്തിവച്ചു. തിരുവല്ല മുനിസിപ്പാലിറ്റിയിലെ നൂറിലധികം വീടുകളിലും വെള്ളം കയറിയിട്ടുണ്ട്. മണിമലയാർ കരകവിഞ്ഞതോടെ മല്ലപ്പള്ളി ടൗണിൽ ഉൾപ്പെടെ വെള്ളം കയറി.മല്ലപ്പള്ളി തിരുമാലിട മഹാദേവക്ഷേത്രം, മല്ലപ്പള്ളി പബ്ലിക് ഇൻഡോർ സ്റ്റേഡിയം എന്നിവിടങ്ങളിലും വെള്ളംകയറി. മല്ലപ്പള്ളിയിൽ മൂന്നു സ്കൂളുകളിൽ ക്യാമ്പുകൾ തുറന്നതായി റവന്യൂവകുപ്പ് അധികൃതർ അറിയിച്ചു.അതേസമയം, പമ്പ, മണിമല നദികളിൽ കിഴക്കൻ വെള്ളം എത്തിയതോടെ അപ്പർകുട്ടനാട്ടിൽ ജലനിരപ്പ് കുതിച്ചുയരുകയാണ്.